Ijika nelanga imenenja kamasipala elahlwe yicala
Ilidlulisele phambili ngoba ithi akulandelwanga imigudu efanele
USAJIKA nelanga, kwakhe uMnu Sipho Nkosi, obeyimenenja kaMasipala waseZululand, olahlwe yicala mhla ka-30 kuNcwaba (August) mayelana nokungaziholeli izisebenzi ngesikhathi esifanele. Nokho uthi lolu daba useludlulisele kwi- bargaining council, ngoba kabenzekanga ubulungiswa ekuchithweni kwakhe.
Kuzokhumbuleka ukuthi ILANGA like labika ngezinxushunxushu ezike zaqubuka kulo masipala ngasekuqaleni konyaka lapho izisebenzi zibhikishile emuva kokuba zingaholelwanga ngesikhathi.
Ngaleso sikhathi kuvele ukuthi uMnu Nkosi nguyena ongakwazanga ukusayina ngesikhathi - ukuba zihole - okuholele ekubeni izisebenzi zize zihole mhla ka-27 kanti bekufanele zihole mhla ka-23, obekuwuLwesihlanu - kwazise umhla ka-25 ubungeSonto.
Mhla ka-26, obekuwuMsombuluko, zifike emsebenzini zingaholile, okuyilapho ziphumele ngaphandle zikhala ngokuthi umasipala uzifaka ezikweletini njengoba sekuze kwangena nenhlawulo yokungazikhokheli izikweletu zazo ( unpaid charges) kuma-akhawunti azo.
Ngokuthola kweLANGA, umasipala ugcine unxephezela izisebenzi ngemali engango-R1.2 million, obekuthiwa kuvalwa ngayo le nhlawulo eyenzeke kuma-akhawunti azo. Imithombo engaphakathi kulo masipala, ithi le mali kuvunyelwane ngayo emkhandlwini kamasipala ukuthi ikhokhelwe izisebenzi - bekuwu-R2 500 umuntu emunye.
Ekhuluma naleli phephandaba uMnu Nkosi, uvumile ukuthi isigcawu sokuqondiswa kwezigwegwe simthole enecala ngokungaholeli izisebenzi ngesikhathi.
“Icala engibekwe lona kakulona elokuthi kunemali engangoR1.2 million okunxeshezelwe ngayo izisebenzi, kepha ngelokuthi kaziholanga ngesikhathi. Icala ngilidlulisele phambili-ke ngoba ngikholwa wukuthi okwenzekile bekungaphezu kwamandla ami,” kusho yena.
Uthi uyakholwa wukuthi kakula- ndelwanga imigudu efanele ngesikhathi kuqulwa icala, yingakho elidlulisele phambili.
Utshele ILANGA ukuthi kakubanga yisiqumo sakhe ukuba kunxeshezelwe izisebenzi ngale mali kepha kube ngesomkhandlu.
Kuzokhumbuleka ukuthi leli phephandaba like labika ngesinqumo soMnyango wezokuBusa ngokuBambisana nezoMdabu KwaZulu-Natal sokususa esikhundleni isikhulu esibekwe ngemuva kokumiswa kukaMnu Nkosi ngoba ku-thiwa kasinaso isipiliyoni esanele ukuqhoqhobala lesi sikhundla.
Njengamanje kuthiwa lesi sikhundla siqhoqhobelwe nguMnu Ronald Hlongwa oyi-chief financial officer (CFO). Imeya kulo masipala, uMfu Thulasizwe Buthelezi, ithe: “Isigcawu sokuqondisa izigwegwe simthole enecala kanti kuliqiniso ukuthi icala ulidlulisile, okuyilungelo lakhe lelo kodwa yena akasekho kwamasipala,” kusho yena. Uqinisekisile ukuthi kulesi sihlalo kubambe uMnu Hlongwa.
Icala ngilidlulisele phambili ngoba ngikholwa wukuthi okwenzekile bekungaphezu kwamandla ami.