UMBONO WOMHLELI
UBUFAKAZI obushaqisayo obethulwe nguNgqongqoshe wezeMali, uMnu Nhlanhla Nene kwikhomishini kaZondo yokuthunjwa kombuso, ( state capture) ngeledlule, benza kucace manje ukuthi wayeqinisile omunye wongqongqoshe eminyakeni embalwa edlule nxa ethi akekho ongenazo izimfihlo zakhe zobumnyama kwi-African National Congress (ANC) nakuhulumeni.
UNgqongqoshe wezabesiFazane eHhovisi likaMengameli, uNkz Bathabile Dlamini, washo la mazwi ashiya abantu bebambe ongezansi evikela uMengameli Jacob Zuma, ngaleso sikhathi okwakunengcindezi yokuba ashiye isikhundla emuva kokuvela kwelinye lamahlazo ayedume ngawo ngesikhathi esalawula izwe.
UMnu Nene udalule ukuthi nebala naye wake wavakashela izikhathi eziningana emzini womndeni wezimanga wakwaGupta osolwa ngokuba nesandla ekuthunjweni kombuso.
Sekuwumlando manje ukuthi lo mndeni ungobhululu bokuqina bakaMnu Zuma nendodana yakhe, uDuduzani, futhi wawusebenzisa igama lakhe ukuxebula umkhoma emalini kahulumeni.
Akumangalisanga ukuthi uMnu Nene wabonana nalo mndeni ngoba phela cishe bonke osopolitiki abanohlonze kuleli, bake bavakashela emzini wawo oseSaxonwold, eGoli.
Isimanga wukuthi phambilini uMadlokovu wake watshela imithombo yabezindaba ukuthi wabonana kuphela nalo mndeni emicimbini yombuso, kukhona abanye abantu, waphika walala ngomhlane ukuthi wawuvakashela emzini wawo.
Ngamanye amazwi, uMnu Nene wayesenga ezimithiyo nxa ephika ukuthi wake wabonana nalo mndeni ngasese.
Emuva kokwethula ubufakazi kwikhomishini kaZondo, uMnu Nene uxolisile kubantu baseNingizimu Afrika ngokubonana namaGupta ngasese emzini wawo, esikhathini lapho kwase kuvele kunezinsolo eziqinile zokuthi lo mndeni ungene shi ezenzweni zenkohlakalo ezithinta izigidigidi zemali yabakhokhi bentela.
Liyasho iBhayibheli ukuthi kakukho okufihliwe okungayukwembulwa. Sekuyacaca manje ukuthi wabe eqonde ukuthini uNkz Dlamini nxa ethi akekho ongenawo amahlazo akhe eqenjini lakhe nakuhulumeni.
Ngokujwayelekile, kubhekeke ukuba ungqongqoshe wezemali kube ngumuntu oqotho, ongenachashazi ngoba phela lesi yisikhundla esibucayi, lapho osisingethe ephathiswe ukhiye wenqolobane lapho kuhlala khona amafa esizwe.
Ngaphandle nje kokuthinteka kwakhe obishini lwamaGupta, ngeledlule kubuye kwavela izindaba zokuthi indodana kaMnu Nene, uSiyabonga, nosomabhizinisi abathile edlelana nabo, babolekwa izigidi yiPublic Investment Corporation (PIC), okuyisikhwama semali yezimpesheni zezisebenzi zikahulumeni.
Lesi sikhwama esifana nebhodwe eliconsa amafutha, singaphansi komnyango wezemali.
Kubikwa ukuthi ngesikhathi indodana kangqongqoshe ihlomula kuso, uMnu Nene wabe engusihlalo waso, okuyizindaba ezingezwakali kahle ngoba kudala ukuba kube nezinsolo zokuthi kungenzeka ukuthi kwaba khona nokwenzelela okungekho emthethweni.
Osekuvelile ngoMnu Nene kushiya imibuzo ngobuqotho bakhe nokuthi ngabe usakulungele yini ukusingatha isikhundla sokusibhekela imali yethu esiyisebenzela kanzima.
Okunye osekucace bha, wukuthi akekho omsulwa kulo hulumeni wethu.
Empeleni nxa kungaphoqeleka ukuba kushenxe bonke abanukwa ezenzweni zenkohlakalo, cishe lonke ikhabhinethi lingasula ezikhundleni, izwe lisale lingenawo uhulumeni.
Konakele bakwethu! Izwe lethu nathi uqobo siyizakhamizi sidinga imikhuleko, sicele usizo kuThixo.