Sikuvikela kokuningi isidlo sasekuseni
UKUDLA isidlo sasekuseni kwenza umqondo umelane nengcindezi yosuku. Ucwaningo longoti bezokudla luveza ukuthi ukudla isidlo sasekuseni kunciphisa isisindo somzimba futhi kunciphisa nengozi yokungenwa kalula yizifo okubalwa kuzona ushukela nomfutho wegazi ophezulu.
Ukungasidli - yize kubukeka njengekhambi kulabo abafuna ukwehlisa isisindo somzimba - kodwa ongoti bathi lona wumkhuba omubi umuntu okungafanele awulandele njengoba kungekho noyedwa ungoti wezokudla oke wathi ukungadli ekuseni kuyasiza ukwehlisa isisindo.
Ukweqa ibhulakufesi kwenza umuntu agcine esedla noma yini eqhamukayo, ngisho engenayo impilo, inqobo nje uma kuzogcwala isisu. Lokhu kudla umuntu asuke esecosha nje phakathi nesikhathi, kusuke kunoshukela, amafutha amaningi nosawoti oweqile futhi kungagcina sekusivala ngisho isikhala sedina.
UNkk Jackie Busch weLiquidlingo Communications, uthi izingane zikopela okusuke kwenziwa ngabantu abadala, ngakho kuhle ukuba sivame ukwenza imikhuba emihle phambi kwazo ukuze zizoyibukela ziyenze impilo yazo yonke. “Uma sidla ibhulakufesi zonke izinsuku phambi kwezingane zethu, makhulu amathuba okuba nazo zilidle futhi lo mkhuba ziwenze impilo yazo yonke.
“Ucwaningo lwakamuva lukhombisa ukuthi ingane edle isidlo sasekuseni yenza kahle nasesikoleni kunaleyo engasidla-nga,” kusho uNkk Busch.
Uthi ziningi izaba ezibekwa ngabantu, abathi yizo ezibenza bangasidli isidlo sasekuseni njengokuthi nje, siyabambezela.
“Lokhu kusuke kuyizaba nje ngoba zikhona izinto ongazihlela ngayizolo ukulungiselela ibhulakufesi, njengokulala ubhoyile amaqanda, izithelo ulale uziqobile ukuze uma sewenza i-oats, uvele uzi-thele nje singasekho isidingo sokuqoba,” kusho yena.