UMQEQESHI WOMVOTI FC NESEXWAYISO ESISHUBILE KUBADLALI
UKHUZA ukuzitshela kubadlali bakhe uJulius “JD” Dube ocija uMvoti FC obhabhadise i-X1 Experience ngo-5-0 koweSafa KZN ABC Motsepe League ngoMgqibelo eKing Edward, eMsinga.
Amagoli oMvoti FC abekwe enethini nguThembile “Kgotso” Madishwa, uBonginkosi “Laffor” Nyembe amabili, uNkosingiphile Khoza noThabiso Mgwaba.
UDube exoxa neLANGA izolo ngeSonto, unxuse abadlali bakhe ukuba bangavuvukalelwa ngamakhanda njengoba imiphumela ibukeka ibavuna kulezi zinsuku. Uthi kuningi asakufunda kulesi sigaba kwazise usanda kuqala kuMvoti FC. Uncoma abadlali ngendlela abazinikela ngayo ejimini. Uthi muhle umsebenzi owashiywa nguBheka “Mlisa” Phakathi (oshone nonyaka engozini yemoto) kwazise kababaningi abadlali abahambile esikwatini sangesizini edlule.
I-Happy Wanderers inqobe ngengcuphe kwiGreenWood Park Friends kuba ngu-3-2 ngoMgqibelo ntambama koweligi eSouth Coast Academy, ePort Shepstone. Amagoli eWanderers ashaywe nguNsizwa “Ntsi” Silangwe noS’fundo “Drogba” Dlamini oqobele amabili kwathi aweFriends ananyatheliswa nguLyod Mbube noDarren “Snowman” James.
I-Maritzburg City iqunjwe phansi yiKwaDabeka Sporting ngo-2-0 ngoMgqibelo eNorthdale Stadium, eMgungundlovu. Amagoli ezikaTom Mtambo eze noSanele Khuboni noThabani Mthembu olokhu eqhubekile nokwenza kahle.
IRaniham Sporting iphendule amatafula idla i-Ashley United ngo-1-0 ngoMgqibelo ePhoenix Stadium. Igoli leSporting lize noNkosikhona Mthembu.
ILadysmith United inqobe ngengcuphe kwiDurban FC kuba ngu-1-0 ngoMgqibelo eSettler’s Park, eMnambithi. Igoli leLadysmith liqotshelwe enethini nguSiyabonga “Divi” Masondo. IKwaDukuza FC ishaye i-Edendale Juventus ngo-1-0 ngoMgqibelo ntambama eStanger High School, eStanger. Igoli leKwaDukuza FC libekwe enethini nguMenzi Gwala.
Isiyonke imiphumela yemidlalo yeSafa KZN ABC Motsepe League imi kanje:- Natal United 0, Dynamos 2; Rainham Sporting 1, Ashley 0; UMvoti FC 5, X1 Experience 0; Maritzburg City 0, Dabeka Sporting 2; Ladysmith 1, Dbn FC 0; KwaDukuza FC 1, Juventus 0; Wanderers 3, Friends 2.