Kungase kuphele ngomdlali oqulekayo
IKings isikaza ukukhohlwa nguPapy Faty
USESIKAZA ukuphonsa ithawula ngoPapy Faty ( osesithombeni) umqeqeshi weReal Kings equmbe phansi iRoyal Eagles ngo2-1 koweNational First Division (NFD) ngoMgqibelo ntambama eSugar Ray Xulu Stadium, eClermont.
USimo “Govuza” Dladla ocija iKings, utshele ILANGA izolo ngeSonto ukuthi usecabanga ukuphonsa ithawula ngoFaty njengoba engakawutholi umbiko wodokotela uqinisekisa ikusasa lalo mdlali kunobhutshuzwayo.
Kuzokhumbuleka ukuthi uFaty uqumbeke phansi waquleka engamakwe muntu komunye wemidlalo yeKings. Ujoyine le kilabhu ngokuqala kwale sizini.
Amagoli eKings emdlalweni neEagles abekwe enethini nguThobani Kunene ngomzuzu ka-51 noScelo Mkhize ngoka-80.
UDladla uthe basalinde umbiko ngoFaty kwazise kabazimisele ngokuthatha amashansi bamsebenzise. Uthi bamudinga eluleme ngokugcwele. Nokho uthi ebholeni kakulindwa isikhathi eside ngakho kuzodingeka ukuba bacabange omunye umdlali. Uthi yingakho sebelande uClifford Mulenga akholwa wukuthi uzongena khaxa esikhaleni sikaFaty uma indaba yakhe igcina ngokungalungi.
“Kuyangijabulisa ukufika kukaMulenga yize ngingeke ngikulibale okwenziwe nguSphiwe Mbatha emdlalweni we-Eagles, ugile izimanga okwenza ngathola ukuphefumula. Bengazi ukuthi i-Eagles izosinika ubunzima kodwa uMbatha wakwazi ukuvala enkabeni yesisu,” kusho uDladla.
USazi Ngubane ocija i-Eagles, uthe iphutha elikhulu abalenzile kube wukuvumela iKings ukuba ichanase esiswini. Uthi kuningi asazozama ukukulungisa. Uthi abadlali bakhe bawudlale kahle lo mdlalo, babe nebhadi izinto kazaze zabavuna.
Isiyonke imiphumela yemidlalo yeNFD imi kanje:- TS Galaxy 0, Ajax 1; Cosmos 1, Cape Umoya 0; Maccabi 3, UBuntu 0; Tuks 1, Tshakhuma 0; Kings 2, Eagles 1; Uthongathi FC 0, TS Sporting 1; Spurs 1, Stellenbosch 3; Mbombela 2, Richards Bay 0.