OWEPIRATES UBONGA UMFOWABO NGEBAFANA
UMDLALI we-Orlando Pirates ubonga umfowabo ngokumvulela amasango empumelelo kunobhutshuzwayo waseNingizimu Afrika.
U-Innocent Maela ( osesithombeni) oyinxele le-Bucs, utshele ILANGA ukuthi ubo-nga umfowabo, uTsepo “Chester” Masilela ngeziyalo ezinhle okuyizona ezimsizayo njengoba eseze wabizelwa nakwiBafana Bafana ezobhekana neSeychelles kowokuhlungela i-Africa Cup of Nations (Afcon) ngoMgqibelo eFNB Stadium, eGoli.
Lo mdlali ubekhuluma naleli phephandaba emuva kokuba ezakhe zibambane namaZulu FC ngo-1-1 kowe-Absa Premiership ngoMgqibelo ebusuku eKing Zwelithini Stadium, eMlazi. Igoli leBucs lishaywe ngu-Augustine Mulenga ngomzuzu ka-15 kwathi eloSuthu leza no-Emiliano Tade ngoka-50.
UMaela uthe yize engathandi ukufaniswa noMasilela ngendlela ayedlala ngayo kodwa naye uyakulobizela ukuqopha umlando wakhe ebholeni lakuleli.
“Kuningi engikufundile kumfowethu futhi ngiyakuqonda ukuthi ngeke ngikwazi ukudlala njengaye kwazise ubekwelinye izinga. Kangithandi ukuthatha udumo lwakhe. Ngiyohlale ngimuhlonipha ngakho konke angenzele khona. Kumele ngizilwele ukufeza ezami izinhloso.
“Ngiyafisa ukuqukula inkomishi, ngibe nendondo yegolide. Ngiyazi ukuthi singakwazi ukufeza leli phupho ngendlela esinabadlali abahle ngayo.
Silwela ukubuyisa isithunzi sekilabhu nokuthokozisa usihlalo (u-Irvin Khoza) ngokumtholela enye yezinkomishi kwazise sesinesikhathi eside sagcina ukuhlomula ngendebe,” kusho uMaela phambili obedlala kwiThanda Royal Zulu eyadayisela AmaZulu FC isitifiketi.
Ebuzwa ngokuqokelwa kwakhe kwiBafana, uthe ukujabulele ngendlela eyisimanga yize ebona kuzokuba wumdlalo onzima. Uthi unethemba lokuthi bazokwazi ukujabulisa abalandeli beBafana ngokunqoba. Uthi usejahe ukuba sekhempini ezoqala ukujima namuhla ngoMsombuluko ukucijela iSeychelles.