Kuboshwe owamathikithi omkokotelo kowe-Arrows
Kuthungathwa isidleke esiwakhiqiza eThekwini
KUBOSHWE obedayisa amathikithi omkokotelo emdlalweni weLamontville Golden Arrows ehlule iBlack Leopards ngo-1-0 wegoli likaKnox Mutizwa elingene ngomzuzu ka-66 kwi-Absa Premiership izolo ngeSonto ePrincess Magogo Stadium, KwaMashu.
ILANGA lizibonele ngawalo owesilisa obebukeka eneminyaka engu-30 ubudala, esekhalelwa ngamasongo kaSigonyela ngokutholakala namathikithi angombombayi. Bekubonakala ukuthi kuhlwe emini kulo mlisa ngesikhathi esethathwa ngamaphoyisa.
UMalusi Dlamini we-Aneme Security okunguyena obeyinhloko yezokuphepha kulo mdlalo, usi- qinisekisile lesi sigameko. Uthe amaphoyisa alandela umkhondo wesidleke lapho ekhiqizwa khona la mathikithi njengoba nasemdlalweni wamaZulu FC neMamelodi Sundowns kudayiswe amathikithi angu-3 000 omkokotelo.
Kulo mdlalo obekungowokuqala ukuthi Abafana Bes’thende baqoqe amaphuzu agcwele ekhaya, le kilabhu ecijwa nguClinton Larsen igijime ingcwenga yebhola.
Ephawula emuva kwalo mdlalo uLarsen uthe:
“Ngijabule kakhulu ukuthi sesikwazile ukuthola amaphuzu agcwele ekhaya. Bengazi ukuthi luzofika lolu suku. Phela ngiphethe abafana abasebancane esikwatini, abasafunda okuningi. USiboniso Conco udlala kahle kakhulu, uzokuya kuya uma eqhubeka ngalolu hlobo.”
UJoel Masutha ongumlolongi weLeopards, uncome i-Arrows ngendlela egijime ngayo kulo mdlalo. Uvikele abafana bakhe ngokuthi basabuye bathuke isisinga kwazise ezakhe zingomakoti kulesi sigaba. Uthi bafike kulo mdlalo ngenhloso yokuvala i-Arrows ingalitholi igoli ngesiwombe sokuqala bese beyicindezela ngesesibili okungabasizanga.
* Imiphumela ye-English Premiership: Liverpool 0, Man City 0; Southampton 0, Chelsea 3; Fulham 1, Arsenal 5; Man United 3, Newcastle 2; Burnley 1, Huddersfield 1; Leicester 1, Everton 2; Tottenham 1, Cardiff 0; Watford 0, Bournemouth 4; Crystal Palace 0, Wolverhampton 1; Brighton 1, West Ham 0.