Ukhozi FM lumise uNgizwe Mchunu
Usolwa ngokungabi nasifuba
UBHUQUZA ekhaya umsakazi woKhozi FM, uNgizwenkosi "Zulu Charmer" Mchunu, omiswe kulo msakazo ngoba esolwa ngokwephula umthetho wangaphakathi kulesi sikhondlakhondla.
Ngokuthola kweLANGA, lo msakazi waseMabhuqwini, eNkandla, osakaza uhlelo "Isigqi Sezwe" kusuka ngo-02h00 kuya ku-04h00, phakathi nezinsuku, umiswe ngempelasonto edlule ngezinsolo zokuthi udalula izimfihlo zangaphakathi kulo msakazo kwabezindaba.
Kuvela ukuthi ngoNdasa (March) nyakenye, kuputshuke izindaba zokuthi uNgizwe uyaxoshwa oKhozini, kwabe sekusolwa ukuthi nguyena olupotshuzile (udaba) kwabezindaba.
Kubikwa ukuthi ubhalele abaphathi ebuza ngalezi zindaba, kodwa watshelwa ukuthi uyakhishwa ohlelweni lwangoMgqibelo uS’giyangengoma - useyoshayela Isigqi Sezwe. Emuva kokuphuma kwalezi zindaba, kwenziwe uphenyo lwangaphakathi njengoba kugcine ngokuthi lo msakazi amiswe.
Umthombo weLANGA uthi uNgizwe ubizwe ngabaphathi bomsakazo wanikezwa incwadi ebicacisa ukuthi wephule umthetho wokuhluleka wukugcina izimfihlo phakathi kwakhe nomqashi.
“Isonto lonke eledlule akekho emoyeni ngoba isimo sinzima kakhulu,” kusho umthombo.
ILANGA liphinde lathola ukuthi lo msakazi uqale ukuba sezinkingeni kakhulu nyakenye ngesikhathi ephenywa yiSouth African Broadcasting Corporation (SABC), mayelana nokwenziwa komcimbi wokuhalalisela umculi kamasikandi, uMroza Fakude, ngokuhlukanisa kwakhe unyaka ka-2016/2017.
Usolwe ngokwephula umthetho ngokumemezela emoyeni wathi uKhozi luzosakazela kubo kaMroza, KwaHlabisa, ngaphandle kwesivumelwano esisayiniwe, okugcine kuvela nokuthi kudlalwe isikhangiso salo mcimbi emoyeni singakhokheliwe.
Uphenyo luqine kakhulu ngoba bekusoleka ubudlelwano obuqinile phakathi kwakhe nenkampani ebiphethe lo mculi, iMabala Noise.
“Okunye okumdalele amazinyo abushelelezi kakhulu, wukuthi wamema uLinda "Mr Magic" Sibiya emcimbini wokugqugquzela abafundi ukuba babuyele ezikoleni, owawungakubo eMabhuqwini, ekubeni ubudlelwano bomsakazo noLinda bebungebuhle.
"Konke lokho kakwehlanga kahle ezikhulwini zomsakazo,” kusho umthombo.
UNgizwe umiswe ngosuku olulodwa noBheka “Beekay” Mchunu yena okubikwa ukuthi umiselwe ukukhuluma ngegama likaLinda emoyeni, emuva kokuba sekuzwakale izindaba zokuthi icala lakhe lenkohlakalo yokukhwabanisa imali engango-R1.4 million eminyakeni edlule - eliholele ekubeni axoshwe kulo msakazo ngo-2014, ulinqobile.
Ethintwa ngalolu daba uNgizwe, uthe akakwazi ukuphawula ngezindaba zasemsakazweni. Okhulumela iSABC, uNkz Neo Momodu, uthe bayazihlonipha izinkontileka abazisayina nezisebenzi zabo, ngakho-ke kabazimisele ngokukhuluma ngezindaba zabo esidlangaleni.
Wehlulekile wukugcina izimfihlo zomsakazo nokuzenzela umathanda.