UGQUGQUZELE INTSHA UKUBA IFUNDE KUSHAKA USHENGE
UNDUNANKULU kaZulu, inkosi Mangosuthu Buthelezi, ugqugquzele intsha ukuba ifunde eSilweni ushaka kaSenzangakhona, njengoba singavumelanga izimo ezazimelene naso empilweni zisithikameze endleleni ebheke empumelelweni.
Inkosi Buthelezi ikusho lokhungesikhathi yethula isilo uZwelithini kaBhekuzulu emkhosini weLembe, eMoses Mabhida Stadium, ethekwini. Ithe intsha mayingangabazi ngekufunayo futhi ingavumeli imuva layo liyikhubaze.
“Isilo ushaka sasineminyaka ewu-29 ngesikhathi sihlala esihlalweni sobukhosi. Sasizalelwe ekhaya, sona nonina uNandi kaBhebhe waseLangeni, babengabantu abanganakekile emphakathini, unina ehlukumezeka,” kusho inkosi Buthelezi.
Iqhube yathi kube uNgqengelele kaMvulane Buthelezi noMudli kaNdaba Zulu ababona ukuhlukumezeka kukaNandi basebekhuluma nabakwaMthethwa ukuba bamdedele abe ngaphansi kwesandla sobukhosi babo.
“UShaka ukwamukele ukufundiswa nokuqeqeshwa. Inkosi uDingiswayo (yakwaMthethwa) yiyona eyafaka iLembe ngaphansi kwesandla sayo, yalikhulisa emzi- ni wayo. ILembe laqeqeshwa ngaphansi kobukhosi bakwaMthethwa, ngaphansi komkhuzi omkhulu wamabutho uNgomane Mdletshe.
“Ngokwamukela kwakhe ukuqeqeshwa, wakwazi ukubonakalisa ubuqhawe nesibindi, wagcina esehlonishwa ngontanga yakhe,” kusho inkosi Buthelezi.
Inxenxe intsha ukuba ihlome ngolwazi, ifunde. “Balaleleni labo abanemiqondo ephusile uma bekhuluma, nilalele nalabo abakhuluma ngokuthula nangokubuyisana. Labo yibona bantu okufanele babengabaqeqeshi benu.
“Kakubona abantu abayizixhwanguxhwangu abangakwazi ukwakha lesi sizwe, kepha yilabo abazihloniphayo. NeLembe ngokunjalo, lalazi ukuthi ukuze liphumelele, kumele lisondeze abantu abanobuhlakani eduze kwalo,” kuqhuba inkosi Buthelezi.
Ibongele isilo ngokuhlanganisa iminyaka ewu-46 sisesihlalweni sokuhola isizwe samaZulu. Ubuthanyelwe yizikhulu zemikhakha eyahlukene okubalwa kuzona ungqongqoshe wezokuBusa ngokubambisana nezoMdabu umnu uZweli Mkhize, ungqongqoshe wezokuThuthukiswa komnotho nezokuVakasha KwaZulu-Natal umnu Sihle Zikalala, ungqongqoshe wezempilo KwaZulu-Natal umnu Sibongiseni Dhlomo, amakhosi nezinduna.
Balaleleni labo abenemiqondo ephusile...