Utakulwe nguSomnandi owodumo lukaVan Damme
Useyiqedile i-albhamu entsha
SITAKULWE yingqwele kamasikandi isihlabani salo mculo esiqophe umlando sihlukanisa u-2016 no-2017 ngengoma yaso eshise izikhotha ethi "Elamanqamu Namhlanje (Sobulal' uVan Damme)", njengoba bese sikhala ngokungahambi kahle kwezinto zaso emculweni futhi nekati lilele eziko.
UMroza "Van Damme" Fakude, obesekhala ngokuthi akasazi uzothathani ahlanganise nani kwezomculo emuva kokuzwakala kwezindaba zokuthi inkampani abeqopha ngaphansi kwayo iMabala Noise, isiyaphuma emculweni. utakulwe nguThokozani "Somnandi" Langa wasoNdini.
USomnandi uthathe leli ciko walifaka ngaphansi kwenkampani yakhe, iSomnandi Sun kanti uthi uthathe lesi sinqumo ngoba engalingabazi ikhono likaMroza.
“Bengingeke ngibukele insizwa esencane ithwele kanzima ngibe ngiwazi kahle umsebenzi wayo, ikakhulukazi ekubhaleni izingoma ezinomyalezo, okuyinto esiyikhuthazayo kubafana abancane,” kusho uSomnandi.
UMroza uthi okwenze wazilahla amakhahlambana kuSomnandi, wukuthi ubebona ikusasa lakhe lishabalala emculweni. Uthi izinto zakhe kazihambi kahle emculweni ngoba akaze athole ngisho indibilishi nge-albhamu yakhe ethi “Kwakhala Nyonini” okuyiyona ebinenoni elithi “Elamanqamu Namhlanje”. “USomnandi ngimcele izikhawu eziningi ukuba angisize, wathi nakuba engenayo imali, kodwa ngeke angilahle ngenxa yomlando wami omuhle nokuthi akukho angakwazi ngempilo yami,” kusho uMroza. Uthi umoya wakhe ubuhlungu ngenxa yokuthi abantu bazitshela ukuthi unemali njengoba ehlu- kanise unyaka ekubeni engenalo ngisho isenti.
Utshele ILANGA ukuthi akazuzanga lutho ngaphandle komklomelo wemoto no-R150 000 akuthole ngeSABC Summer Song.
“Abantu bacabanga okunye ngami, bazitshela ukuthi nginemali. Ingoma yami yayidlalwa emisakazweni nakomabonakade kodwa kangikaze ngithole lutho ngayo.
“Ngesikhathi ngihlukanise unyaka, bengisebenza kwezinye izindawo kodwa ngitshelwe ukuthi ngiceliwe nje ukuyonandisa, ngeke ngikhokhelwe,” kusho lo mculi othi useyiqedile i-albhamu yakhe entsha ethi “Kulahleke Ushuni”, izophuma maduze nje.
UMroza usebenze isikhathi eside ngaphansi kwenkampani Izingane Zoma ngesikhathi efika kwezomculo kodwa wahlubuka kuyona ngenxa yokungeneliseki ngezinto ezithile.