Limlahlile owabhaxa isalukazi
Isilinde isigwebo ekupheleni kwenyanga
ILAHLWE ngecala yiNkantolo yeMantshi yaKwaHlabisa ngoMsombuluko isicela intethelelo intombazane yaseMdletsheni, eHluhluwe, ephenduke indabizekwayo ivela ezinkundleni zokuxhumana ibhaxabula isalukazi esiyisihlobo sayo ngoba isisola ngokuthi siyibize ngesifebe.
UMbali Nontethelelo Ndlovu (19), okumanje ugcinwe ezitokisini kuze kuba kushaya umhla ka 29 kuMfumfu (October), okuwusuku lokukhishwa kwesigwebo ngecala lakhe azivumele yena ukuthi walenza elandela ukuhluthuka kwenhliziyo, ucele uxolo emantshini nasemphakathini wangakubo ngokushaya uNkz Nelitha Ngcobo (69).
“Nkosi yenkantolo ngiyaxolisa, ngamshaya ugogo ngoba ngilalela ukuhluthuka kwenhliziyo. Ngangikhubekile engethuka ethi ngiyisifebe esiphuza utshwala bakhe ngenkani.
“Ngiyaxolisa nakubo bonke abantu bangakithi ngokuhlaza igama lendawo nesizwe saseMdletsheni, ngangingahlosile ukuba udaba lugcine lukulesi simo, ngeke ngiphinde,” kusho uNkz Ndlovu esebhokisini enkantolo. Imantshi, uMnu Don Ngcobo, ithe:
“Ngesizathu sokuthi washaya umuntu omdala okufanele umvikele, inkantolo ikulahla ngecala lokushaya ngenhloso yokulimaza umuntu omdala nelokwehlisa isithunzi.
“Uzogcinwa ezitokisini kuze kuba kufika usuku lokukhishwa kwesigwebo sakho esizokwandulelwa wumbiko wosonhlalakahle abazowethula ngalolo suku,” kusho imantshi.
UNkz Ngcobo uveze ukuthi noma angaxolisa uMbali kodwa yena kakulula ukuba amthethelele ngoba ubukise ngaye, emshaya ephindelela, yena engabuyiseli ngenxa yokungabi namandla okuzilwela.
“Makaxolise lapho enkantolo yakhe, mina ngiyoqala ukumxolela ngoba sengibonile ukuthi kuphume isigwebo esiwugculisayo umphefumulo wami. Le ngane yayifuna utshwala bami ngenkani, ngagcina sengiyibize ngaleli gama, kodwa lokho kakusho ukuthi kwase kufanele ingishaye.
“Namanje ngiyazibuza ukuthi yini lena engaka engayidla kule ndawo ngoba bonke abantu bayazenzela nje lapha kimi. Ngiyashaywa kungabikhona ongikhulumelayo.
“Le ngane yabukisa ngami, ngifuna ukubona igwetshwa futhi nje ngeke ngisakwazi ngisho nokuhlangana nayo endleleni ngoba sengiyayesaba.
“Njengoba ibingaphandle ngebheyili yamahhala nje, ibilokhu idlula ngasemzini wami ingibize ngawo wonke amaganyana abuhlungu, ithi mangiyosula icala, ngicabanga ukuthi ngiyini nje,” kusho uNkz Ngcobo.
Enkantolo bekukhona abebegqoke imibala yeNkatha Freedom Party (IFP) neye-African National Congress (ANC) beyokweseka uNkz Ngcobo.
Ingxenye yamalungu omphaka- thi izwakalise ukuthokoza kwayo ngokuvuma icala kukaMbali.
Ulahlwa yicala nje, kuvele kunesigwebo esilenga phezu kwekhanda lakhe asinikwe yinduna yesigodi sangakubo, uMnu Mndeni Ntombela, ngesikhathi kukhulunywa lolu daba esigcawini sayo eSihlahleni samaThongo, eStezi.
Uhlawuliswe inkomo ehamba ngamasondo ngecala lokushaya umuntu omdala, elokuhlambalaza isizwe saseMdletsheni nabantu abangaphansi kwaso.
UMnu Ntombela akagcinanga lapho, uhlawulise umndeni wakubo kaMbali izimbuzi ezintathu ngenxa yokuhluleka wukulawula ingane ize igcine isiwumdlwembe okhathaza umphakathi.