BAGQEMEKILE KUSHONA UGWALA
KUNGAKAPHELI sikhathi esingakanani unobhutshuzwayo waKwaZulu-Natal ulahlekelwe nguBheka Phakathi, obengumqeqeshi woMvoti FC ogijima kwiSafa KZN ABC Motsepe League, oshone engozini yemoto, seliphinde lagadla ifu elimnyama.
Lesi sigaba (ABC Motsepe) sesilahlekelwe nguMnu Sizwe Mthandeni Gwala obengumnikazi we-Edendale Juventus, okhale ngekhanda ngoMsombuluko washonela kwakhe KwaDambuza, eMgungundlovu.
UMnu Gwala ubebuye abe ngumnikazi weSMG Investments Holdings ebiyenza imisebenzi ehlukene okubalwa kuyona ukuhlela imicimbi. UMnu Sizwe Mchunu oyimene
nja- jikelele kwiJuventus, utshele ILANGA izolo ngoLwesithathu ukuthi namanje basashaqekile ngokudlula emhlabeni kukaMnu Gwala obefana nobaba emphakathini waKwaDambuza.
Uthi ubebathanda abantu futhi ehlale efisa ngaso sonke isikhathi ukusiza umphakathi wendawo ngazo zonke izindlela.
Kuningi athi bakufunde kumufi kwazise ubengumuntu ohlale ephokophele impumelelo.
Ngaphandle kweJuventus, uMnu Gwala ubenelinye iqembu eligijima kwiSafa SAB Mgungundlovu okuyi-Isizwe FC - ebeliphakela iJuventus abadlali abasakhula.
UMnu Mchunu uthe kuzokuba nenkonzo yesikhumbuzo namuhla ngo-14H00 eCity Hall ePietermaritzburg kuthi eyokumphelezela ibe kwaCaluza Indoor Centre ngoMgqibelo ngo-09h00 bese eyobekwa endaweni yakhe yokugcina emathuneni aseMountain Rise, eMgungundlovu.