Kumiswe u-principal
Kusolwa ukungqubuzana kwakhe nemenenja
KUSUKE isidididi izolo ngo-Lwesithathu ekuseni eMashiyamahle High School, eNdwedwe, emuva kokuba abafundi bevale amasango becasulwa wukumiswa kukathishanhloko.
NgoLwesibili uthishanhloko wakulesi sikole, uMnu Mthembeni Ntanzi, uthole incwadi emmisayo emsebenzini ngoba esolwa ngokwenza kungasebenzeki kulesi sikole.
Lokhu kucasule abafundi okuthiwa izolo ekuseni baphuce unogada okhiye maqede bavalela othisha ngaphandle. Kuze kwadingeka ukuba kufike usihlalo wesigungu esilawula isikole, uMnu Ndabisekhaya Ndwandwe, okhulume nabo, savulwa isikole.
Ekhuluma naleli phephandaba uMnu Ndwandwe, uthe abafundi bathukuthele kakhulu njengoba kumiswe uthishanhloko wabo. Uthe namuhla kuzoba nomhlangano nabazali lapho kuzophunywa khona nesinqumo ngaphambi kokuba baye ehhovisi lesekhethi.
“Kusiphathe kabi okwenziwa ngabahloli ngoba kabazange basazise thina njengesigungu esilawula isikole ukuthi bamisa uthishanhloko. Kangiyazi into ezokwenzeka lapha ngoba izingane zithukuthe- le,” kusho yena.
Kuthiwa uMnyango wezeMfundo umise uMnu Ntanzi ngoba umsola ngokuthi unesandla ekutheni abafundi bengavumi ukwamukela imiphumela yabo kamatikuletsheni yangonyaka ka-2014.
“Kwenzeka lokhu nje, bekunokushayisana ngemibono phakathi kwemenenja yesekethe noMnu Ntanzi. Imenenja yesekethe izame ukuqasha uthisha wayo, ifuna ukumfaka esikoleni kodwa washaya phansi ngonyawo uthishanhloko, wathi kukhona odingwa nguyena, oyile nto ayifunayo futhi usemenzisile nenhlolokhono nesigungu sesikole,” kusho umthombo.
Kuthiwa umsuka omkhulu walolu daba wukuthi ngoNcwaba (August) nonyaka, iNhloko yoMnyango wezeMfundo KwaZulu-Natal, uDkt Enoch Nzama, ibihambise imiphumela kulesi sikole nezikhulu zomnyango, kodwa abafundi bashaya phansi ngonyawo bathi kabayifuni esihlanganiswe nemiphumela yezichibiyelo zalezi zifundo okwakuthiwe mabaziqale phansi.
“Impi enkulu ngeyokuthi umnyango ufuna uthishanhloko alahle abafundi nokuthi ngesikhathi wawuhambise imiphumela wabonakala (uMnu Ntanzi) engenaso isikhathi sawo kwabe sekusolwa ukuthi naye unesandla ekutheni abafundi babe yimpi,” kusho umthombo.
UMengameli weNational Teachers Union (Natu), uMnu Allen Thompson, uthe bazolwa nale ncwadi yokumiswa kukaMnu Ntanzi oyilungu labo ngoba izizathu zayo kazizwakali.
Uthi lokhu okwenziwe wumnyango wezemfundo kuyimizamo yokudayisa izikhundla kulesi sikole nokubheca uthishanhloko ngobende inyama engayidlanga.
“Ukumiswa kwakhe sikubona kuyindlela yokususa icala kuwona umnyango ngobudedengu bawo. Okusijabulisa kakhulu wukuthi umphakathi uyakholelwa kuthishanhloko ngoba useneminyaka eminingi ephethe lesi sikole, ngakho-ke akasoze asibulale. Abahloli banezinhloso ezimbi zokufuna ukuphathela uthishanhloko isikole ngendlela yabo, bafuna nezingane zilwe naye,” kusho uMnu Thompson.
Okhulumela uMnyango wezeMfundo, uMnu Kwazi Mthethwa, uthe: “Sikholwa wukuthi kunabantwana abafunayo ukuthola imiphumela kodwa kunalabo abafuna kuhlale kuliwa, kungasebenzeki esikoleni. UDkt Nzama ngiyacabanga ukuthi ubezama ukuthi kusebenzeke kahle, kubanjiswane.”
Mayelana nezinsolo zokungahoshelani kukaMnu Ntanzi nemenenja yesekethe, uthe ngeke akwazi ukuphawula ngoba lezo yizinsolo ezingaqinisekisiwe.