Kuwubizo ukuba ngumeluleki wengqondo
ZIYOGCINA ngokuwasha amehlo izinsiswa ebezinethemba lokuzidlisa satshanyana kwisiphalaphala sentokazi ebesibonakala ohlelweni lukamabonakude, uTatakho obelukhonjiswa njalo ngoLwesibili, isizini yalo ephele ngeledlule, njengoba ithi inalo isoka eliseMpumalanga ngokomsebenzi.
Kulolu hlelo uNkz Nozibusiso Nyawose (28) uyi- clinical psychologist esebenzisana noNimrod Nkosi ongumethuli walo. Okwakhe wukweluleka ngokwengqondo leyo mindeni esuke ihlukumezekile ngemuva kokuthola iqiniso elivezwa wulibofuzo olusuke lwenziwe.
UNkz Nyawose uthi uchitha isikhathi esiningi esemsebenzini lapho esebenza khona ngokugcwele njenge- clinical psychologist, emahhovisi asePassenger Rail Association of South Africa (Prasa), eThekwini. Uphinde abe namagumbi angasese okweluleka iziguli eMlazi Mega City nakwa-AA.
Umnene futhi ukhuluma ngezwi elipholile uma echaza ngempilo yakhe. Uzalelwe eSouth Coast, eMandawe wakhuliswa ngunina emuva kokushiywa nguyise esaneminyaka engu-10.
Ufunde amabanga aphansi eSt Francis Primary, wedlulela eMzinto High lapho ephothule khona izifundo zikamatikuletsheni.
WAYENGAQONDILE UKUBA YI-PSYCHOLOGIST
Uthi wayengahlosile ukungena kulo mkhakha wabeluleki bengqondo emuva kokuphothula umatikuletsheni.
“Nganginesifiso sokwenza izifundo zobudokotela ngigxile ekubeni yi- neuro-surgeon, ngebhadi basinqaba isicelo sami esikhungweni engathumele kusona. Ngabe sengibheka umkhakha osondelene nalowo engingawenza, ngazithela kwi- clinical psychology,” kusho yena. Uthi esaqala ubengenalo uthando oluphelele lwalo mkhakha kodwa kuthe esephakathi yavutha inhlansi yawo. “Iminyaka eyisihlanu ngisafunda ngiyichithe e-University of KwaZulu-Natal, eThekwini kwathi emibili yokugcina ngayiqedela ePietermaritzburg,” kusho yena. Uthi emuva kwalokho ube esenza i- in service training esibhedlela iPrince Mshiyeni ngaphambi kokuba avule amagumbi ngokuzimela. Uma echaza ngomsebenzi wakhe nezingqinamba anokubhekana nazo, uthi labo abasuke beze kuyena beyolulekwa ingqondo banokungamethembi ngenxa yeminyaka yakhe. Uthi kulo mkhakha kakuyi ngeminyaka kodwa okubalulekile yisineke, yimfundo, yisipiliyoni nendlela enokuzihlonipha nokuhlonipha umsebenzi wakho okubalulekile. “Akuwona umsebenzi wokulalela izinkinga zomuntu lona kodwa wubizo lokusiza ukwethula umuntu umthwalo osemahlombe, umenze abuke umhlaba ngelinye iso. “Kuyangisiza kakhulu ukuba ngumuntu okholwayo yize ngingathandazi. Uma ngingena ehhovisi into yokuqala engiye- nzayo ngiyakhuluma ngibeke konke engifisa ukuba usuku lwami lube yikho.
“Kumele ngihlale ngiqinile emoyeni ukuze ngizokwazi ukubhekana nezimo ezizoletha ithemba komunye umuntu,” kusho yena.
Uthe lokhu akusho ukuthi yena akanazo izingqinamba zempilo, kodwa uma esemsebenzini kumele azibeke emnyango abhekane nomsebenzi.
UNkz Nyawose uveze isithombe esibuhlungu mayelana nomkhakha awusebenzelayo nokungaqondi kwabantu umthelela izifo zengqondo eziba nawo kubantu nasemphakathini jikelele.
Uthe emhlabeni jikelele isigamu sabantu siphila nezifo ezahlukene zengqondo, abaningi abazibiza ngamagama alumelayo okubalwa kulona elithi “isifo sezinhlanya.”
Ubalule ingcindezi ( depression) njengesihamba phambili emhlabeni jikelele. Zikhona nezinye azibalile njenge- bipolar, yi- personality disorder ne- schizophrenia njengezinye izifo ezibalwa njengezengqondo.
Uthi kuyadabukisa ukuthi iningi labantu abamnyama bayishaya indiva indaba yengcindezi kanti ingagcina isikhiphe isidumbu. Wenze umzekelo ngoTatakho wathi bujulile ubuhlungu obusuke buzwiwa yilabo abambandakanyeka ohlelweni.
Uthi akugcini nje ngokuthi kube wubuhlungu bokuthola umphumela kodwa kokunye umuntu usuke edonse nalobo buhlungu iminyaka ngaphambi kokuba baze bavele ohlelweni.
“Ngingena lapho-ke mina ekubelulekeni ukubapha amaqhinga okubhekana nezimo ezibukeka ziwumqansa abasuke bebhekene nazo,” kusho yena.
Uthe miningi imithelela edala ukuba umuntu agcine esenengcindezi wathi kungaba yizimo umuntu abhekene nazo, yindlela akhule ngayo, yisikompilo lendawo umuntu akuyona nokunye. Ugqugquzele umphakathi ukuba uthole usizo lokwelulekwa ngokwengqondo ezibhedlela zikahulumeni nakulezo ezizimele. Uma engekho emsebenzini uNkz Nyawose uthi ukhonze ukuzikhipha nabangani bakhe athi basemkhakheni wezempilo njengaye noma avakashele isoka lakhe elisebenza esifunda zweni iMpumalanga.