Kuningi okuhle ngewayini uma liphuzwa ngendlela
EZIKHATHINI eziningi kumnandi ukuba yintatheli egxile kwezokungcebeleka nakuba nakho kunezakho izinselelo njengawo wonke umsebenzi.
Okwenza lo msebenzi ube mnandi wukuthi ngesinye isikhathi ukuvuleleka kwamathuba okwazi kangcono nangoncamnce cishe okusuke kungelula ukuwathola uma ungekho kulo mkhakha.
Komunye umcimbi ngibe nenhlanhla yokuhlangana noMnu Sipho Cele oyiBrand Manager yenkampani iDu Toitskloof ephisa futhi ekhiqiza amawayini.
Uvele wangifaka esikoleni nje esikhaleni, wangichazela ngobuhle bewayini emzimbeni. Ngenxa yokuthi ngizwile ukuthi kuningi akuchazayo ngimnxuse ukuba avele lolu lwazi aluqobele phansi ukuze kube lula ukuba nathi sabelane ngalo nabafundi beLANGA abathanda iwayini nalabo abangathanda ukwazi ngalo.
Uthi kayikho indlela enhle noma embi yokuphuza iwayini kodwa kunezindlela ezenza ulithokozele kahle. Uthi uqaphelile ukuthi kuningi okungafanele esikwenzayo ikakhulukazi KwaZuluNatal ekuphuzeni iwayini elibomvu nokuyilo alisebenza kakhulu.
“Ngiyasiqonda isimo sezulu esifudumele kulesi sifundazwe kodwa le nto yokufaka amaqhwa ewayinini elibomvu kayilungile. “Iwayini elibomvu ngelokugcinwa nje endaweni evulekile ejwayelekile ( room temperature), lingafakwa nasefrijini. Abanye ubafica sebeliphuza njengelamaPutukezi noma sebelithambisa ngeCocaCola. “Kunamawayini aphuzelwa injabulo nje kuphela angenanzuzo ngakwezempilo emzimbeni. Iwayini elibomvu lilungele kahle inhliziyo, ukuhamba kwegazi emzimbeni nokuqinisa amathambo nokuyinto abaningi abangayazi,” echaza.
OKWENZEKA UMA UPHUZA INGILAZI YEWAYINI ELIBOMVU NGOSUKU:
Umzimba uyafudumala, Lilekelela ukukuvikela ekuhlaselweni yizifo ezihlasela inhliziyo,
Likwenza ubukeke uchachambile, ukhululekile ebusweni ngoba lithambisa izicubu zenyama ezihlathini,
Ulala uthi zwi njengengane ebusuku ukwedlula nalabo aba phuze amanzi kuphela,
Lishisa amafutha angadingeki emzimbeni, likulekelele ungahlaselwa yisifo sikashuke la esiwu-type 2 diabetes. Eqhuba echaza ubalule nalokho:
Elimhlophe lehla kahle nenyama emhlophe, amasaladi nokudla okune- acid.
Elibomvu lehla kamnandi nenyama ebomvu nokudla okunama- spice.
Zikhona nezinhlobo zamawayini oziphuza uma sewuqeda ukudla ongalishaya ngama- tot lihambisana ne- dessert, pudding, ice cream, strawberries njalo njalo.
Abekucacisa uMnu Cele wukuthi kunezindlela zokuliphuza iwayini uma ufuna ukulithokozela, ungezukulinkunka njengomqombothi.
Iningi alizixaki ngokwazi izindlela ezifanele zokuphuza iwayini, kodwa lisuke liphuzela ukuba mnandi, hhayi ngoba nakhu kukhona okuhle elikwenza emzimbeni.
Ezinye izindlela zokuliphuza iwayini ukuze ulithokozele ungazithola nakwi- website yabo ethi www. dutoitskloof.co.za