Ungabi uscuthe emsebenzini
abanye baze basho ukuthi ngeke batshelwe ngumuntu wesifazane,” kuchaza yena. Uthi kubalulekile ukuba nothando kulo msebenzi nokukwazi ukusebenzisana nabantu ukuze ukwazi ukwenza umsebenzi ngendlela okuyiyo.
“Uma usulaphaya ngaphandle isicucu semfundo onaso kasibe sisasebenza- siza kamuva ngoba amadoda afuna ukubona ukuthi uyayazi yini lento okhuluma ngayo.
“Uma ukhuluma ngokubeka ipayipi noma ukumba umgodi ngendlela okuyiyo kumele ubatshengise ukuthi ufuna kwenziwe kanjani. Kuba sengathi kawazi lutho uma uzogcina ngokukhuluma,” kuchaza uLondiwe.
Uthi ungene kulo mkhakha ngoba engathandi ukubona izinto sezenziwe kodwa ufuna ukuba yingxenye yazo.
“Ukubona umgwaqo ubhidlika emuva kwesikhashana noma isakhiwo, bekungiphatha kabi ngoba bekusho ukuthi kukhona umuntu ongawenzanga kahle umsebenzi wakhe. Ngingene kulo mkhakha ngoba ngifuna ukuqinisekisa ukuthi umphakathi uthola izakhiwo ezisezingeni eliphezulu,” echaza.
Uthi kayikho into emgqugquzela njengokubuka umsebenzi akade eyingxenye yawo usesesimeni esihle. Uthi uma ungunjiniyela kusuke kungasiniswa amahleza ngoba uma kukhona okungahambanga kahle kwiphrojekthi ethile kumele uqhamuke nezimpendulo ukuthi kwenzekeni.
“Igxathu negxathu esilihambayo kumele ngibe nezwi, ngiphasise ngisho kungabe yinto encane kanjani ngoba izoba nomthelela,” kuchaza uNkk Nkosi.
Kwabafisa ukufundela lo msebenzi uthi kubalulekile ukuthi baqinise kwiMaths nasekukwazini ukudweba futhi bavolontiye emisebenzini abafisa ukugxila kuyo.
“Uma ufuna ukufaka amapayipi, volontiya ngakini ukuze abantu bakwazi ukuthi uyawazi umsebenzi kuthi kuqambe usuqedile esi- koleni ube usuzenzele igama futhi usukhuluma ngento oyaziyo.”
Njengowesifazane oseshadile futhi onabantwana ababili babafana uthi kakulula ukuba kulo msebenzi kodwa wuthando kuphela olukugqugquzelayo.
Uthi akapheki nsukuzonke ngoba kwesinye isikhathi ubuya ekhathele eyimvithi ngenxa yokuba ngaphandle usuku lonke.
“Umyeni wami uyakuqonda ukuthi ngeke ngikwazi ukuba wusuperwoman ekhaya nasemsebenzini ngibe ngisebenza emkhakheni ogcwele abesilisa ngale ndlela. Kubalulekile ukuba nomndeni nabantu abakwesekayo ukuze izinto zibe lula,” kuqhuba yena.
Uthi kubalulekile ukuthanda umsebenzi owenzayo futhi uzibambe ziqine.
“Awukwazi ukuba uvele uchiphize phambi kwamadoda uma sekunzima, kumele ubheke phambili -uzazi ukuthi uzeleni. Kwesinye isikhathi kuzoqhamuka ngisho abafuna ukukufumbathisa kodwa mawuzazi ukuthi ungubani ngeke ulingeke,” kuphetha uLondiwe.