KULAHLEKE OBEVAKASHELE UMNGANI
UPHITHENE amakhanda umndeni wakwaMajola, eNdwedwe emuva kokulahleka kwendodana yawo osekuyophela isonto ingaziwa ukuthi ikuziphi izinkalo.
Kubikwa ukuthi uMnu Bhekimvelo Majola (31), ugcine ukubonakala ngeSonto kade ehambe nabangani bakhe bevakashe eMtubatuba.
Okwenza umndeni uphithanelwe ngamakhanda, wukuthi omunye walaba abebehamba noMnu Majola, uveze ukuthi kube nengxabano endleleni, eholele ekubeni omunye umngani wakhe amshaye maqede amkhiphe emotweni abebehamba ngayo.
UNkz Thandeka Mdletshe, ongunina wengane kaMnu Majola, futhi abehlala naye KwaDukuza, uthi ugcine ukumbona ngeSonto ntambama edolobheni yena eya emsebenzini.
Uthi emuva kwesikhathi, umshayele ucingo esesemsebenzini efuna ukubheka ukuthi ufike kahle yini ekhaya. "Ungitshele ukuthi akabange esaya endlini, kodwa bavakashele kubo kamngani wakhe u...(egagula umngani ngegama).
"Kangizange ngibe nankinga ngoba lo mngani abekhuluma ngaye, ngiyamazi, ubejwayele ukufika endlini emvakashele. Kudlule isikhathi ngaphinde ngamshayela ucingo, wangitshela ukuthi sebezofika eMtubatuba, uzongazisa uma sebekhona.
"Ngibone kuhamba isikhathi engashayi ngaphinde ngamzama, kodwa ngaleso sikhathi ucingo lwakhe belungasangeni, lukhombisa ukuthi luvaliwe. Ngihlalile ngizitshela ukuthi mhlawumbe balalile, kodwa nangakusasa wangabuya endlini.
"Ngishayele lo mngani wakhe abebevakashele kubo, kodwa wangitshela ukuthi mangibuye ngimthinte usematasa esiteshini samaphoyisa. Emuva kwalokho kangibange ngisamthola ocingweni,” kusho uNkz Mdletshe.
Uthi emuva kwezinsuku ezimbili engabuyi uMnu Majola, unikele esiteshini samaphoyisa KwaDukuza eyowabikela. UNkz Nokuthula Majola, ongudadewabo kaMnu Majola, uthe: "Sicela noma ngabe ngubani ongaba nolwazi aphumele obala ukuze sizokwazi ukumthola umfowethu, sikhathazekile ngaye."
Okhulumela amaphoyisa KwaZulu-Natal, uLt Col Thulani Zwane, uthe likhona idokodo elivuliwe ngokulahleka komuntu, namanje ubengakatholakali.