Intatheli ichukuluzwe ngumlandeli kamsolwa
Bese eyifesele ngezibhakela efuna ukuyishaya
KUCISHE kwasuka uthuli lweziChwe ngaphandle kweNkantolo eNkulu yaseThekwini ngesikhathi omunye wabalandeli bakaMnu Thabani Mzolo (23), osolwa ngokubulala uNkz Zolile Khumalo, obeyisinqandamathe sakhe, echukuluza intatheli ebithwebula abebephuma enkantolo ngoMsombuluko.
Isenzo sakhe sicasule abomndeni kamufi, kwathi mabamudle bamfele lo mlandeli kammangalelwa.
UMnu Mzolo ubizwe kuqala ohlwini lwamacala abezoqulwa eCourt F, uMshushisi u-Adv Kelvin Singh watshela ijaji, uMnu Graham Lepes ukuthi ummeli kammangalelwa, uMnu Charl Claassen useyahoxa ukummela ngenxa yokuthi akakhokheliwe.
Uthe usezomelwa ngabameli bakwaLegal Aid futhi ucela icala lihlehlele umhla ka-15 kwephezulu, okuwuMsombuluko.
Ijaji lisihlabe lasihlikiza isenzo sika-Adv Singh noMnu Claassen lathi bekungamele lokho kuhlehlise ukuqulwa kwecala.
Linqume ukuba uMnu Mzolo abuyiselwe ezitokisini avele ngoMsombuluko. Abomndeni kamufi baphume enkantolo bedumele, bekhala ngokusuka kude bese icala liyahlehliswa.
Baphume bama ngaphandle kwenkantolo besabhunga, izintatheli zabathwebula. Kuthe kusenjalo, kwaqhamuka ibhobhodleyana labuza intatheli ukuthi ithwebulelani.
Kube lizithintele emndenini kamufi, wabhoka wakhahlela, lashaya isishwapha salo layosithela liqhweba ngezandla lifingqe inqindi likhombisa ukuthi lingashaya umuntu.
Kubonakele ukuthi lithatha amashansi ngoba bezingekho izitshudeni zaseMangosuthu University of Technology (MUT) - lapho bekufunda khona umufi - ezihlala zigcwele enkantolo uma kungena leli cala.
Ngaphambi kokuhlala kwenkantolo, uMnu Singh wazise umndeni kamufi ukuthi kuzomele namuhla ngoLwesine ubonane nomshushisi ozophatha lolu daba ukuze abachazele konke ngokuzokwenzeka ngaleli cala.
Ngokwamaphepha athwesa uMnu Mzolo icala, kuthiwa wangena ngokungemthetho lapho kwakuhlala khona umufi wamfica enomngani wakhe, wavulela ngenhlamvu waphangalala.
Kuthiwa waziyisa yena kwabakwasidlodlo abangabuzanga mkhuhlane, bamphonsa esitokisini. Ezinkonzweni zokukhumbula umufi, izitshudeni abefunda nazo bezimnakaza ngezinhlamba uMnu Mzolo.