USINDE NGOKULAMBISA KUDUTSHULWA ABABILI EMOTWENI
UTHUKA izanya usomatekisi waseMlazi osinde ngeNkosi ngoMsombuluko kudutshulwa kubulawa ozakwabo ababili abebesemotweni yakhe.
Ngokuthola KweLANGA, uMnu Nqaba Mbhele, onamatekisi asebenzela eSiphingo noMnu Senzo Luthuli ongenayo itekisi, babulawe behleli emotweni kaMnu Siphamandla Mzobe onamatekisi eSiphingo.
Ekhuluma neLANGA uMnu Mzobe, uthi nakuba uyakhuluma, usindiswe wukuthi bathe befika ngasenxanxatheleni yezitolo KwaMnyandu, kwaT, eMlazi, wehla emotweni wangena ezitolo eyohlangana nothile obezomphathisa imali eya ekhaya. "Ngithe sengiphuma nje KwaMnyandu, ngezwa kuqhuma isibhamu abantu sebegijima beza ngasemnyango wasenxanxatheleni yezitolo. Bathe kukhona abadutshulwayo, besho bekhomba ngalapho engipake ngakhona imoto yami.
"Ngivele ngoma ngifika emotweni isimbobombobo, ngathi ngivula izicabha, abafowethu sebeshonile," kusho uMnu Mzobe. Uthi uyasola ukuthi uMnu Luthuli bamdubulala nje, bebezitshela ukuthi nguyena. "Ngisinde nje ngoba ilanga lami belingakafiki. Sekunesikhathi ngithola izingcingo zabantu bethi bazongibulala.,
"Ngilindele noma yini engenzeka kimina ngendlela engisatshiswa ngayo, kufanele ngabe sengiyagadwa, kodwa kanginayo imali yonogada, bayabiza," kusho uMnu Mzolo. UMnu Mbongeni Mbhele ongumfowabo kamufi, uthi kabazi ukuthi umfowabo ubenzeni aze abulawe ngentululwane yezinhlamvu ngale ndlela.
Uthi uzofihlwa kusasa ngoLwesihlanu. Okhulumela amaphoyisa KwaZulu-Natal, uLt Colonel Thulani Zwane, uthe akekho osaboshiwe ngalesi sigameko. Kubulawa lo somatekisi nje, ngoMandulo (September) ILANGA libike ngokubulawa kukaMnu Nicholas Gumede, obenamatekisi asebenzela oThongathi.
Ulandelwe ngoMnu Sihle Zulu odutshulwe wabulawa noMnu Praysgod Sikhakhane obeyomnikeza umsebenzi wokushayela enye yezimoto zakhe. Lesi sigameko besilandela ngesinyantise igazi sokubulawa kwabantu abawu-11 abadutshulwe behamba ngetekisi beyofihla uzakwabo obenamatekisi eColenso.