Likhulu isasasa ngeNhungu
OweLANGA uhlose ukutshala uthando lwezinkanyezi entsheni
BELILIKHULU isasasa emqhudelwaneni womdlalo osungulwe yintatheli yeLANGA esimnkantshubomvu, uMnu Sazi Majola, obizwa ngeNhungu (okuyigama lesiTsonga elisho u-8) obusezinkundleni zemidlalo eNagina, eMariannhill, kusukela ngoMgqibelo waze waphela ngoMsombuluko.
Kule midlalo bekubhekene amaqembu amane, okuyi-Aquarians "The Waterboyz", iTaurians "Pleiadians", iCancerians "Aquaterrazens‚" neHerculeans "The Slayers‚" egcine idle umhlanganiso.
Lo mdlalo, ohambisana nezezinkanyezi, uMnu Majola uthi uwusungule ngoMasingana (January) 2017 ngoba enesifiso sokuba kutshaleke uthando lwezezinkanyezi entsheni emnyama, kwazise ziyahambisana neSayensi, yiMaths, iGeography ngisho neChemistry - okuyimikhakha edingeka kakhulu kulesi sikhathi samanje.
Inkundla yawo inamakhona awu-8, inamapali awu-8 aqanjwe ngemihlaba ezungeza iLanga - Mercury, Venus, Earth, Mars, Jupiter, Saturn, Uranus neNeptune.
Iqembu ngalinye linabadlali abawu-4 ababizwa ngezinkanyezi (Rigel, Uy Scuti, Sn 1987 a nePsr JO 348-0432), linikwa amathuba awu-8 ukuhlohla amagoli kuwona wonke amapali ukuze lithole iphuzu elibizwa nge-Orbit.
Lithumela umdlali oyedwa (obi- zwa ngePulsar) ozongena enkundleni ahlohle amagoli kuMercury noVenus, okuthi uma eqa ulayini obizwa ngo-0.99 AU, esebheke kuEarth, unompempe (obizwa ngoProxima Centauri) adedele umdlali wezitha (obizwa ngeWhite Dwarf) ukuba amjahe.
Uma emficile, kwenzeka okubizwa nge-Eclipse (okufaniswa ne- wicket kwikhilikithi)
"Ngaphandle kokugqugquzela uthando lwezezinkanyezi kubantu, lo mdlalo uhlanganise cishe imidlalo ewu-5 uwodwa njengoba unamapali kanobhutshuzwayo, elombhoxo nele- netball, kanti indlela odlalwa ngayo icishe ifane nesetshenziswa kwikhilikithi.
Ibuye ihlanganise nezokusuba- tha njengoba ukuze umdlali aqede i-Orbit, kufanele ahlohle amagoli kuwona wowu-8 amapali bese egijima ezungeza inkundla ehamba eqa onozinti njengoba kusuke kwenziwa kubasubathi beqa amahurdle," kusho uMnu Majola.
Uthi lo mdlalo ungasiza abadlali bakanobhutshuzwayo ukuba babebukhali ekuhlohleni amagoli nabombhoxo - ikakhulukazi i- flyhalf, scrumhalf, fullback, ama- winger nama- centre - uma kufanele bakhahlelele ipali.
Uthi lo mdlalo ungasiza abadlali bakanobhutshuzwayo asebethathe umhlalaphansi ngoba bangawudlala baze babe neminyaka ewu-45 kuya ku-50 ubudala.
"Kugcwele manje kunobhutshuzwayo, okuwumdlalo othandwa kakhulu emhlabeni, abadlali baningi, kanti amaqembu asesigabeni esikhokhelayo mancane. Ngicabanga ukuthi ngaphandle kokusiza intsha ifunde ngalo mdlalo, uzoyisiza nasekutheni ibe nolunye uhlobo lomdlalo oluhambisana nonobhutshuzwayo, engazithokozisa ngawo ngaphandle kokuba abazali bakhathazeke ngokuthi izolimala," kusho uMnu Majola.
Ukubuyela emqhudelwaneni, ngoMgqibelo; i-Aquarians ihlule iCancerians ngo-2-1 kwi- semi final yokuqala, kweyesibili iHerculeans yaguqisa iTaurians ngo-1-0.
NgoMsombuluko iTaurians idlule kwiCancerians ngo-6-5 kubangwa indawo yesithathu, iHerculeans yabhubhisa i-Aquarians ngo-8-3 kowamanqamu.
USabelo Cele weCancerians ukhale wemuka nomklomelo womdlali ovelele, uSihle Sibiya weHerculeans wahamba noweTop Orbit maker (8) noweTop Eclipse maker (3). UMnu Majola uncome waphinde wabonga abadlali ngokuzinikela.