SIGUDLA NOGALAKAJANA
OBHUTIMADLISA basenkingeni njengoba inani likaphethilomu selimb’ eqolo nje, kanti bona bahamba ngezimoto zaseJalimani ezinezinjini ezinkulu eziphuza okwezidakwa zikabhiya.
Phela abekho abantu abankintsha njengabaphuza ubhiya. Baphuza ngezingilazi ezinkulu futhi bawuthela emphinjeni sengathi bathela unemenayithi. Kangisakhulumi-ke ngalaba abaphuza ngojeke.
Uthola umuntu eseminya, ungafunga ukuthi yinjini yohlobo lweV12. Abaphuza ugologo basheshe badakwe, balale, kukhale omama endlini ngoba phela iselula isuke ingasayibambi inethiwekhi.
Nabo-ke obhutimadlisa sebebamba beyeka ngoba phela amapatshazi, lawo okuthiwa phecelezi ama- slay queen, kawanandaba namadoda athi anemali, kodwa anendaba nalawo anemali.
Uwashela ngemali, kube sekuthi gwijiji usukhala ngophethilomu. Angithi unemali wena, ngakho ukubiza kukaphethilomu makungabi yinkinga.
Obhutimadlisa abaningi bathi banemali bengenayo.
Umuntu umthola ethenga imoto kanokusho, ebe engenayo ngisho indlu.
Ofeleba basahlala nonina umuntu aze akhelwe umjondolo emuva kwendlu, kodwa ehamba ngesilwane semoto.
Bathi uma bebambile, babhukhe emahhotela aphezulu, umuntu ulala esikebheni sombhede kubo, lona othi uyalala kuwo, uwe phakathi nendawo, uzithole usumbethe umatilasi - yilona abawubiza ngosikebe mketule - nobhulankethi usugcwele izimbungulu.
Le mali abayinika la ma- slay queen ukuba ayokwenza izinzipho, bangathenga umbhede osezingeni eliphezulu, balale ntofontofo.
Njengoba uphethilomu usubiza kangaka, eziningi izinsizwa seziyasokola ngoba phela lezi zimoto zazo zaseJalimani naseNtaliyani, ziphefumula ngawo.
Uthi uyayidumisa nje, ibhavumule, idle amalitha ayishumi, lapho kawukahambi, usayidumisa nje.
Kunensizwa esiphuza nayo utshwala ehamba ngeMaserati, kodwa kulezi zinsuku ifika ngemoto encane, kanti isinomkhuba wokucela thina ukuba sithenge ugologo.
Mina ngiyitshela kahle ukuthi imoto yayo ibiza isigidi nohhafu, kanti mina ngihamba ngebiza uhhafu wesigidi, ngakho ngeke ngiyithengele utshwala.
Kangidlaleli futhi kuma- slay queen. Mina kangisiboni isidingo sokuba athi umuntu enezinzipho zakhe zendalo, abuye afune ezokufakelwa.
Nakhona lapho, insizwa endala engangami izifunani izingane ezincane ezingazi nokuthi imali iyasetshenzelwa?
Ama- slay queen azi nje ukuthi imali iyadliwa, kodwa akazi ukuthi iyasetshenzwa.
Mina ngisola bona obhutimadlisa ngoba bayikhipa imali sengathi ikhiwa esihlahleni.
Bathatha imali yamanabukeni bayoyidla nama- slay queen, izingane sezikakela inabukeni elilodwa.
Yize sisola obhutimadlisa, nabo abesifazane kumele bazi ukuthi umtholampilo unawo amaphilisi nemijovo yokuhlela umndeni.
Ngeke udade athi uphunyukile ngoba kukhona namaphilisi aphuzwa ekuseni uma ungakhumbuli kahle ukuthi ulithathile yini leli elokuhlela umndeni.
Le nto yokuthi kumele indoda uyitholele umntwana ukuze ikushade, seyadlula kudala.
Uma wena usahamba ngaleyo ndlela yakudala, uzosala uzikhulisela ingane uwedwa, usulandela- na nendoda engafuni ukukhipha imali yeqolo.
Abesifazane kumele bakhumbule ukuthi njengoba bewazi amalungelo abo, nabesilisa ngokunjalo sebeyawazi awabo.
Ngakho-ke ungahambi wena uthathe isinqumo wedwa ukuthi uzokhulelwa ungazange ukhulume nomlisa wakho.
Kumele leso kube yisinqumo enisithatha nobabili.
Uma wena ukhetha ukuthola ingane nobhutimadlisa, kusho ukuthi kukhona okungahluzekanga lapha ekhanda.
Obhutimadlisa bayadlisa nje kuphela, abanasikhathi sokuqala umndeni nawe.
Abaningi banabafazi nemindeni, ngakho ngeke baqale imindeni yesibili.
Imali kaphethilomu kwayona ibahleli entanyeni njengoba abaningi kabanayo le mali abathi banayo.