Izinkunzi zaseSoweto nebuya eThekwini

Zinemidlalo emqoka yeMDC eClermont

ZIKHUZA ibuya eThekwini izinkunzi zaseSoweto ezinemidlalo yeMultiChoice Diski Challenge (MDC) ngempelasonto eSugar Ray Xulu Stadium, eClermont.

I-Orlando Pirates ibambane namaZulu FC ngo-1-1 kowe-Absa Premiership ngoMgqibelo ebusuku eKing Zwelithini Stadium, eMlazi. IKaizer Chiefs ihlulwe yiPolokwane City ngo-1-0 ngawo uMgqibelo eMoses Mabhida Stadium.

La makilabhu akhuza ibuya kuleli dolobha emidlalweni yeMDC ehambisana nomcimbi wobumnandi. Le midlalo izokuba ngoMgqibelo nangeSonto eSugar Ray Xulu Stadium, eClermont. IPirates Reserves iqhathwe neBaroka FC Reserves ngoMgqibelo ngo-12h00, kanti iChiefs Reserves izodudulana neFree States Stars Reserves ngeSonto ngo-12h00. Imidlalo ehambisana nomcimbi wobumnandi seyibuya ihlandla lesibili eThekwini kwazise ivulwe eMpumalanga Stadium, eHammarsdale.

Omunye umdlalo obhekwe ngabomvu ngowamaZulu FC Reserves azobhekana neCape Town City Reserves ngoMgqibelo ngo-10h00 eClermont. Lo mdlalo ufaniswa nowamanqamu njengoba la makilabhu eshintshana ngokuqhwakela kwi- log. USuthu Reserves oluqeqeshwa ngu-Ayanda Dlamini ( osesithombeni), luhleli phezulu ngamaphuzu angu-10 emidlalweni emine kanti iCity Reserves isendaweni yesibili ngamaphuzu angu-9 emidlalweni elinganayo. Imidlalo yeMDC ngempelasonto:NGOMGQIBELO EBidvest Stadium: Bidvest Wits Reserves vs Maritzburg United Reserves 10h00.

ELucas Moripe Stadium: SuperSport United Reserves vs Black Leopards Reserves 10h00.

EDr Molemela Stadium: Bloemfontein Celtic Reserves vs Chippa United Reserves 10h00.

ESugar Ray Xulu Stadium: AmaZulu Reserves vs Cape Town City FC Reserves 10h00; Orlando Pirates Reserves vs Baroka FC Reserves 12h00. NGESONTO E-Old Peter Mokaba Stadium: Polokwane City Reserves vs Mamelodi Sundowns Reserves 10h00.

ESugar Ray Xulu Stadium: Golden Arrows Reserves vs Highlands Park Reserves 10h00, Free State Stars Reserves vs Kaizer Chiefs Reserves 12h00.