AwaseGermany kwafuna owePSL
Kusolwa isiteleka kumdlali weTeam of Choice
KUVELA izindaba zokuthi ugaqelwe ngamakilabhu agijima eligini enkulu yaseGermany, iBundesliga, uSiphesihle “Mbesuma” Ndlovu ongumdlali weMaritzburg United okuputshuka nokuthi ushaya isiteleka esiwumshoshaphansi ngenxa yokuthi ufuna ukuhamba kule kilabhu eyiqale kabi isizini ye-Absa Premiership.
Nokho okugqamile ngayo wukwehlelwa yifomu kukaNdlovu (22) odlala esiswini kule kilabhu.
Lo mdlali ushaya into ephansi kulezi zinsuku kangangoba useze wakhishwa ngisho eqenjini lesizwe iBafana Bafana.
ILANGA lithole ukuthi lo mdlali wehlelwe yifomu nje, yingoba ingqondo yakhe iphazamisekile njengoba efunwa ngapha nangapha.
Kuleli ufunwa uthuli yiMamelodi Sundowns okuthiwa inesivumelwano esenze neMaritzburg sokuba kube yiyona emsayinisayo ngesizini ezayo.
Leli phephandaba liphinde lathola ukuthi iHoffenheim neFortuna Dusseldorf okungamakilabhu agijima kwiGermany Bundesliga, asefake izicelo zokusayinisa lo mdlali ngokwahlukana.
Kuthiwa kunamanye amakilabhu akuyona le ligi nawo amfunayo.
Leli phephandaba lishayela uFarook “Ntshebe” Kadodia ongumnikazi weMaritzburg ngalolu daba, uthe isiyamnenga emoyeni indaba kaNdlovu.
“Sengikhathele manje wukukhuluma indaba kaNdlovu ngoba ingi- phathisa ngekhanda. Inkinga wukuthi usuke washintsha umuntu obemuphethe kwajika izinto.
"Sinesivumelwano esinaso neSundowns ngaye kodwa umphathi wakhe omusha wabe esemtshela ukuthi ufuna ukumyisa e-Europe.
"Ngiyizwile eyamakilabhu agijima kwiBundesliga kodwa besingakathintwa muntu njengoba iwindi lisavaliwe,” kusho uKadodia.
Imizamo yokuthola uJazzman Mahlakgane okuthiwa ungumphathi omusha kaNdlovu iphunzile njengoba ucingo lwakhe belukhala kodwa lungabanjwa.
Ngesizini edlule uNdlovu ubambe elikhulu iqhaza iMaritzburg ifinyelela kowamanqamu weNedbank Cup lapho igcine yehlulwa khona yiFree State Stars eCape Town.