OWODUMO KWI-BUCS NE-CHIEFS USEGIJIMA KUMA-AMESHA
BAVUMBUKE kuma-amesha abadlali abazakhele olukhulu udumo begijima emakilabhini ahlukene kwiPremier Soccer League (PSL) nakwiBafana Bafana.
ILANGA lithole ukuthi uBongani “Drogba” Ndulula odlale kwiBloemfontein Celtic, kwi-Orlando Pirates, kumaZulu FC, kwiKaizer Chiefs nakwiBafana ukukha nje phezulu, usesayine kwi-Alexa-nder Black Aces egijima kwiSouth African Football Association (Safa) Gauteng ABC Motsepe League. Omunye umdlali osekhonjwa kwiAces nguLuvolwethu Mpeta obedlala kwiPlatinum Stars ngesizini edlule no-Ayanda Mtshali obekwiBloemfontein Celtic.
Lezi zindaba ziqinisekiswe nguGordon “Amen” Masondo oyimenenja ye-Aces. UMasondo uthe inhloso enkulu yokulanda laba badlali wukuqinisa kakhulu le kilabhu. Uthe basanda kukhulula uTshwarelo Bereng othathwe yiBlack Leopards. UMzikayise “Mzie” Mashaba kabamthathanga. UMasondo uthi iseyinde indlela esazohanjwa, kusengenzeka noma yini kulesi sigaba njengoba sebedlale imidlalo emine.
Kuzo ezeMotsepe League, iJDR Stars egijima esigabeni esifanayo isayinise uRyan Chapman oke wayibamba kwiLamontville Golden Arrows, u-Augustine Leonard noThabo “Wakka” Mpetha.
I-Ashley United egijima kwiSafa KwaZulu-Natal ABC Motsepe League, seyiqashe uMncedisi “Dada” Sibiya njengomqeqeshi wayo omusha. Ngesizini edlule izintambo beziphethwe ngu-Alex Zondi waseMgungundlovu.
Imidlalo yeSafa KZN ABC Motsepe League engempelasonto ihlelwe kanje:NGOMGQIBELO EKing Zwelithini Stadium: Ashley United vs Natal United 12h00, Durban FC vs Happy Wanderers 15h00.
E-Eastbury Grounds: Rainham Sporting vs UMvoti FC 15h00.
ESJ Smith Stadium: Dabeka Sporting vs KwaDukuza United 15h00.
EMkomaas Grounds: X1 Experience vs Maritzburg City 15h00. NGESONTO ESJ Smith Stadium: Summerfield Dynamos vs Milford FC 15h00.