IDowns iluzwela ubuhlungu uSuthu
KUNXUSWA abalandeli bamaZulu FC ukungquzuka kuzona zonke izinkalo zaseZululand ukuhambela ukhukhulelangoqo womhlangano ozokuba ngoMgqibelo ngo-9 ekuseni eMPCC Hall, oLundi.
UQedi Dlamini oyiMenenja yoSuthu, uthi kumqoka ukuba abalandeli bagcine isikhathi ngoba ngemuva kwawo kuzoyiwa emdlalweni neMamelodi Sundowns wePrince Mangosuthu Legacy Cup ozokuba ngo15h00 ePrince Mangosuthu Regional Stadium khona oNdini.
USuthu luzotheleka kusasa ngoLwesihlanu oNdini luvakashele eThengisangaye Primary School, eThokoza. Ngemuva kwalokhu le kilabhu izoyoziqeqesha kule nkundla okuzodlalelwa kuyona. Umphakathi uvumelekile ukuzobuka uSuthu luziqeqesha. Ngakusasa ngeSonto uSuthu luzoyokotha iSilo uGoodwill Zwelithini kaBhekuzulu KwaNongoma.
ISundowns yona izotheleka ngoMgqibelo ekuseni njengoba izobamba indiza ezohlala eRichards Bay. Kuzokuba neGala Dinner kusasa ngoLwesihlanu kusihlwa eGarden Court yasoNdini.
Elinye ithimba leDowns lizotheleka kusasa ngoLwesihlanu oNdini. Kusasa kuzofika uThulani “TT” Thuswa, u-Alex Shakoane noThemba Zwane odlala esiswini kule kilabhu, olimele. Abadlali bona bazotheleka ngendiza ekhe-thekile ngoMgqibelo, kanti bazobuyela eGauteng ngemuva kwalo mdlalo.
UThuswa uthe bajabule kakhulu ngokuthola ithuba lokuyohlangana nabalandeli bekilabhu baseZululand.
“Sijabule kakhulu ngokumenywa kulo mqhudelwano wokuhlonipha uMntwana. Sizizwa sibaluleke kakhulu njengekilabhu ngokuba yingxenye yawo. Okungithokozisa kakhulu wukuthi nami ngidabuka KwaZulu-Natal. Nokho-ke okubi wukuthi inkomishi sizohamba nayo ukuya eTshwane.
“Ngiluzwela kakhulu uSuthu ngoba nangonyaka odlule luhlulwe yiBloemfontein Celtic. Akukuhle ukuthi uSuthu luzophuthwa wukuqukula le nkomishi ihlandla lesibili kulandelana. Lo mqhudelwano sizowusebenzisa ukuqinisa ubudlelwano esinabo noSuthu,” kusho uThuswa.
Kulo mdlalo kulindeleke ukuba abaqeqeshi bala makilabhu, uCavin Johnson woSuthu noPitso Mosimane weDowns banike ithuba abadlali abangajwayele ukuthola isikimu.