ABAGIJIMI BAWACONSELA AMATHE AMABHONASI KWI-FNB DBN
INGQWELE yeSpar Women’s Grand Prix izimisele ngokuzibuyisa zishisa izinduku kubagijimi abayibhincisele nxanye emjahweni wokugcina weSpar Women’s 10km Challenge obuseGoli ngeledlule.
UGlenrose Xaba onqobe iGrand Prix, utshele ILANGA ukuthi ufuna ukubagabisela ngezithende u-Irvette van Zyl ( osesithombeni) noGerda Steyn abamvove inkani ngeledlule.
Laba bagijimi bazophinda bahlangane kwiFNB Durban 10km CITYSURFRUN ezokuba ngeSonto eThekwini.
Emlenzeni wokugcina ngeledlule eGoli, uGlenrose ungene isine kwiSpar Women’s 10km Challenge enqotshwe ngu-Irvette kwathi indawo yesibili yathathwa nguGerda ozilungiselela iNew York City Marathon.
Ekhuluma neLANGA ngoLwesibili uGlenrose, uthe uzogijima kunqamuke iteki ngeSonto ukuzama ukudla ubhedu kulo mjaho ophethe isiteki sika-R30 000 kwizingqwele ngokwahlukana kobulili.
“U-Irvette noGerda bagijima kahle kakhulu kulezi zinsuku kodwa kanginendaba nabo. Ngizimisele ngokwenza kangcono isikhathi sami se-10km esingu-33:21 kulo mjaho. Ngifuna nala mabhonasi akhona. Okuhle wukuthi njalo uma ngigijima eThekwini ngenza kahle. Ngiphume isibili emlenzeni wesithathu weSpar, ngaba yingqwele yeTotalsports Women’s 10km.
"Lokho kungenza ngibe nokukhulu ukuzethemba ukuthi ngizokwenza kahle nangeSonto.
"Phela eThekwini kuzalwa khona ubaba wami,” kusho uGlenrose osubathela iBoxer.
Abanye abasubathi okubhekwe ukuba badlise ngamapayipi uGlenrose nguStella Chesang, uMercyline Chelangat bobabili base-Uganda. Kwabesilisa kubhekwe ukuba uJoshua Cheptegei wase-Uganda asivikele ngempumelelo isicoco sakhe, kanti uzokube ekhiphana inkani noJulien Wanders waseSwitzerland, uThabang Mosiako, uRyan Mphahlele, u-Elroy Gelant ukukha nje phezulu.
Umgijimi ozokwephula irekhodi lakuleli labesilisa elingu-27:38 uzothola u-R50 000, ozokwenza u-27:59 athole u-R30 000, u-28:29 u-R20 000, u-R28:59 u-R12 000, u-29:29 ngu-R6 000 kanti u-29:59 uzothola u-R3000.
Nasesigabeni sabesifazane bazokuba bomvu yimali njengoba umsubathi ozokwephula u-31:13 kaElana Meyer awenza ngo-2001 ezothola u-R50 000 kwehle njalo kuze kufike ku-34:30 ophethe u-R3000.
Abadidiyeli balo mjaho bathe ungenelwe ngabasubathi abangaphezulu kuka-6000 kanti angaphezulu kuka-100 ama- elite runners.
Kwaziswa abasubathi abayingxenye yalo mjaho ukuthi izinombolo ziqala kusasa ngoLwesihlanu ukulandwa kusuka ngo12 emini kanjalo nangoMgqibelo.
Bayaziswa abasubathi ukuthi ngeke zikhishwe izinombolo ngosuku lwalo mjaho.