I-CHIEFS ISIKAZA OWE-TELKOM ETHEKWINI
Balimala ubuthaphuthaphu abadlali beBafana
SEYIPHENDUKE ukhiye wekusasa likaStuart Baxter ongumqeqeshi weBafana Bafana imidlalo emibili ebucayi ezogijinywa yilesi sikwati neSeychelles yokuhlungela i-Africa Cup of Nations (Afcon) ezokuba ngonyaka ozayo eCameroon.
IBafana izodudulana neSeychelles emlenzeni wokuqala wokuhlungela i-Afcon ozokuba ngoMgqibelo ngo-15h00 eFNB Stadium, eGoli, kuthi kowesibili la maqembu ashukane ngoLwesibili ngo-15h30 ekuhambeni eStade Limite, eSeychelles.
UBaxter uyiqale kabi ikhempu yale midlalo elinyalelwa ngabadlali ababili uThapelo Morena noVincent Pule. Laba badlali bajoyine uKeagan Dolly noBongani “Ben 10” Zungu abangekho ngenxa yakho belu ukulimala. Indawo kaPule noMorena ithathwe nguThami Mkhize noThembinkosi Lorch. Izolo kulimale uSibusiso Vilakazi indawo yakhe yathathwa nguGift Links.
ILANGA likhuluma noKwenzakwakhe Ngwenya oyinhloko yethimba leBafana, uthe kungaba yishwa elikhulu esizweni uma lesi sikwati singehluleka ukungena kwi-Afcon.
“Sinethemba elikhulu lokuthi iBafana izofinyelela kwi-Afcon yangonyaka ozayo. Le midlalo emibili yeSeychelles imqoka kakhulu ukuba siyinqobe. Kasifuni ngisho ukuyicabanga eyokuthi singase singayi kwi-Afcon. Phela kungamele umqeqeshi azinuke amakhwapha,” kusho uNgwenya.
Irekhodi likaBaxter njengoba eshaye ibuya kwiBafana kalilihle njengoba ehlulekile ukufaka lesi sikwati emidlalweni yeNdebe yoMhlaba ebiseRussia kulo nyaka. UBaxter wafica iBafana isemgqeni wokungena kweyeNdebe yoMhlaba kodwa wayihola kabi ihlulwa ngompushana iCape Verde Islands kabili, ekuhambeni nakuleli, kwaba wukushabalala kwamaphupho.
Lesi sikwati siboshelwe naneNigeria neLibya kuleli qoqo. Sivule ngokuhlula iNigeria ekuhambeni sase sibambana neLibya eThekwini. Emuva kwemidlalo neSeychelles iBafana izodlala neNigeria kuleli neLibya ekuhambeni.
Kusenjalo, uSifiso “Choppa” Hlanti oyisitobha seBafana, utshele ILANGA ukuthi bamagange ukungena ensimini bayosobozela iSeychelles. Uthi bazibophezele ukujabulisa abalandeli bakuleli ngokunqoba le midlalo. Kulindeleke ukuba abagadli beBafana baphaphame phambi kwamapali njengoba isanda kulanda uShaun Bartlett ukuqinisa ithimba labaqeqeshi. UBartlett uthathe indawo kaQuinton Fortune oxinwe wumsebenzi kwiManchester TV.
Kubadlali lesi sikwati okulindeleke ukuba ithembele kakhulu kubona ukuqhamuka namagoli kukhona uPhakamani Mahlambi, uPercy Tau noKamohelo Mokotjo.
Le midlalo emibili yeSeychelles imqoka kakhulu ukuba siyinqobe...