KUPHUME ISIDUMBU NGENXA KA-KISS
Umsolwa ukhethise umufi isikhali okumele afe ngaso
ASABAMBE ongezansi amalungu omphakathi waKwaFelekisi, eManzimtoti ngesihluku asibonile ngoMsombuluko ekuseni owesilisa edubula ebulala omunye ngoba emsola ngokuthi uqabule isandla wasiphephetha ebhekise kumshana wakhe ( blowing kiss).
ILANGA lithole ukuthi uMnu Sphamandla Chonco (24), udutshulwe wabulawa ngumsolwa - esingeke simdalule okwamanje aze avele enkantolo - eseguqile ecela uxolo kumsolwa.
Uyise kamufi, uMnu Nunu Nene, uthi bathole ukuthi indodana yakhe ibihamba nabangani bayo bedlula eduze komuzi kamsolwa. Uthi ibingelele inkosikazi kamsolwa ebisegcekeni nabashana bakhe abalingana nayo (indodana yakhe).
Uthi uqede ukubingelela inkosikazi wabe esedlalisa abashana, ngokuqabula emoyeni waphephetha ebhekise ngakubona, wabancoma ethi bahle. Ubekwenza lokhu nje ubengamile, ubehamba nabangani bakhe bezishayela kancane.
Umsolwa, obesendlini ngesikhathi ezwa lokho, uthukuthele wagana unwabu wangena ekamelweni wadonsa isibhamu nommese, walandela umufi nabangani bakhe, ngokusho kukaMnu Nene.
Uthi utshelwe ukuthi umsolwa uyilandelile indodana yakhe wayifica endaweni eyibanga elingaqhelile nomuzi wakhe. Ufike eduze kwayo abangani sebebalekile, yaxolisa imtshela ukuthi ibibadlalisa abashana bakhe.
Umsolwa, okuthiwa ubedinwe egane unwabu, ukhethise umufi ukuthi ufuna amlimaze ngasiphi isikhali phakathi kommese nesibhamu abekuphethe.
UMnu Nene uthi umsolwa udubule indodana yakhe ngenhlamvu eyodwa esifubeni, okuthe uma isiwele phansi wayikhahlela, emuva kwalokho wabuyela emzini wakhe wangena emotweni, waqonda esiteshini samaphoyisa eyowabikela ngasekwenzile.
“Namanje ngisazibuza ukuthi uyenzeleni le nto u.... (emgagula ngegama) ngoba uyangazi futhi ngumuntu esijwayelene naye, sikhule ndawonye.
“Usengaze abulale indodana yami ngale ndlela! Ukuba ubenenkinga nendodana yami, bekumele angifonele ngaleso sikhathi kunokuba ayibulale ngesihluku esingaka,” kusho uMnu Nene.
Uthi indodana yakhe ibingeyena umuntu oyisixhwanguxhwangu, ibizikhonzele ibhola nengoma.
Uthi abantu abebesemgwaqweni ngesikhathi umsolwa edubula indodana yakhe, bazamile ukuyicelela uxolo kodwa kwanhlanga zimuka nomoya.
“Ngihluleke nokuzibamba ngesikhathi ngimbona efika namaphoyisa endaweni yesigameko, ngayocela ukukhuluma naye ukuze angichazele ukuthi uyibulaleleni indodana yami.
“Kunokuba angiphendule, umane wankwankwaza, emuva kwalokho waxolisa,” kusho uMnu Nene.
Okhulumela amaphoyisa KwaZulu-Natal, uLt Col Thulani Zwane, uthi kuvulwe icala lokubulala, umsolwa uzinikele emaphoyiseni ngemuva kwalesi gameko.
Usengaze abulale indodana yami ngesihluku...