KUNCISHISWE IMALI YOXHASO BAQOMA UKUVALA IZINKULISA
BACASULWE wukuncishiswa kwesabelomali bagaxa izingidi emasangweni abanikazi bezinkulisa ezixhaswe wuhulumeni KwaZulu-Natal, okwenze ojahidada baphenduka ondingasithebeni ngeledlule.
Abanikazi balezi zinkulisa ezivaliwe; okubalwa ezaseNkandla, ezaseJozini nezaseMtubatuba, bathi uMnyango wezokuThuthukiswa koMphakathi KwaZuluNatal, unciphise lesi sabelo ungabazisanga bona. Bathi uma bebuza kubaphathi, akekho ophumela obala, yingakho bebone kungcono ukuba bame ukusebenza.
Ngokusho kukaNkk Simphiwe Shabangu, ongumgqugquzeli wabanikazi bezinkulisa eMtubatuba, enkulisa yakhe unezingane eziwu209, ubexhaswa ngo-R32 000 ngenyanga, kodwa ngenyanga edlule umnyango umfakele u-R9 000.
“Ngokwazi kwethu ingane ikhokhelwa u-R17. Kule madlana umnyango oyifakile, kufanele ngincozule kuyona ngikhokhele othisha,” kusho uNkk Shabangu.
UNkz Ntando Ngculwane, ongumnikazi weSenzokuhle Creche eseNkandla, uthi izingane zifikile enkulisa yakhe kwaphoqeleka ukuba azijikise njengoba uku- dla obekumele baziphakele khona bekungenele kwazise umnyango unqume ukunciphisa uxhaso ngaphandle kokuxoxa nabo.
"Besihamba singena umuzi nomuzi sitshela abazali ukuthi mabame ukuletha izingane zabo kuze kube le nkinga iyaxazululeka. Sizamile ukuthola umqondisi ukuba asichazele ngale nkinga, sahlala ehholo saze sajika engasafiki.
"Siyizisebenzi zasezinkulisa, sibona umnyango usithatha kalula futhi uthatha kalula nabazali bezingane esizifundisayo,” kusho uNkk Ngculwane.
Okhulumela uMnyango wezokuThuthukiswa koMphakathi KwaZulu-Natal, uNkk Ncumisa Ndelu, uthi into eyenzekile wukuthi umnyango ubonile ukuthi imali obuyikhipha phambilini, ibiyeqile (kwibhajethi), obekuzokwenza ukuba sithi sifika isabelo mali esilandelayo kube kungasekho lutho, izingane sezingasadli uqobo.
Ngaleyo ndlela-ke, wukubopha izifociya kusemanje okuzokwenza ukuba kuphele unyaka kusekhona izingane ezikucoshayo. "Kangikholwa wukuthi kabaziswanga, okungenzeka ukuthi bazisiwe kodwa bangaqonda. Ngenxa yokuthi lolu wuhlelo oluqhubekayo, sizolokhu sibafundisa ngalo," kusho uNkk Ndelu.