Ibandla lifuna kuxoshwe umfundisi
Amakholwa athe ngeke aphumule zingakafezeki izikhalo zawo
AMASHE alibhekisa ekomkhulu lebandla lawo eMphumulo, KwaMaphumulo, amalungu eLutheran Church ngoLwesibili ephelezelwa ngabefundisi, efuna ukuba unobhala omkhulu waleli bandla, uMfu Themba Khathi (68), aphume aphele emagcekeni asemishini ngoba ethi usephelelwe yisikhathi.
Kusize ukuba khona kwamaphoyisa nabefundisi abebeqaphe ukuthula ukuze kungasuki uthuli lweziChwe.
Abazalwane bebephethe uhlu lwezikhalo futhi beyitholile imvume yokwenza inhlabaluhide, kodwa izifiso zabo zokungena ngaphakathi ehlalamengameli, kaziphumelelanga, bakhalinywe ngamaphoyisa.
Bagcine bengatholanga muntu oyisikhulu sebandla ukwamukela izikhalo zabo, zaze zemukelwa ngamaphoyisa.
Basuke lapho bayoba nenguyazana ehlane, eceleni komgwaqo bebhunga ngombhikisho ngoLwesibili. Kukhona abathe ube yimpumelelo, kodwa abanye bathi kayifezekanga inhloso yabo yokukhipha uMfu Khathi nokungena ngaphakathi.
Bafunge bagomela bathi ngeke baphumule zingakafezeki izikhalo zabo.
Umthethosisekelo webandla lamaLuthela ukubeka kucace ukuthi umuntu oseneminyaka ewu-65 ubudala, kumele athathe umhlalaphansi kanti uMfu Khathi uhlanganise le minyaka ngo-2016 kepha akahambi.
Bafuna kube nomhlangano wesinodi lapho kusuke kukhethwa khona omengameli, abathi sekuhlehliswe kabili ukukhethwa kwabo.
Akuphele ukumiswa komengameli abawu-10 ababoshelwe amanqina enyathi.
Makuxazululwe izinkinga zebandla ngokulandela inkambiso yokukholwa.
Ngesikhathi kuvulwe ithuba lemibuzo nemibono ehlane eMphumulo, kuningi okuvelile okuyizinkinga ezikhungethe leli bandla.
Kukhona abebesola ukuthi uMfu Khathi useyiselesele emsamo nje, yingoba ubona ukuthi kungase kuvuke amacala amadala okunyamalala kwemali ewu-R40 million uma sekungena abanye.
Kukhona ofike nombono wokuthi njengoba bengavunyelwa ukungena ngaphakathi, kumele umbhikisho wabo wenzeke noma yikuphi lapho kuhlangenwe khona njengebandla.
Kugcine kuphumelela umbono wokuba kutholwe umeluleki wezomthetho ozolwa lolu daba lokungathathi "umhlalaphansi" kukaMfu Khathi ekubeni esephelelwe yisikhathi nokwephulwa komthetho wokukhethwa kwesinodi, okuyizinto ezisemthethweni.
Kuvele nokuthi selokhu kwaqubuka inkinga yokusetshenziswa ngokungemthetho kwemali yebandla, baningi abefundisi asebedla imbuya ngothi. Nabaholi bamasekethe bathe sebezophuma umkhankaso wokuba bahlangane kulwiwe le mpi. Ngesikhathi kuqhubeka ukubonisana kwasehlane, amaphoyisa abelokhu ezulazula.
Emuva kokuvumelana ngokuba kuthathwe izinyathelo zomthetho, kushe ingoma nomkhuleko. Kwabebehola lo mbhikisho kubalwa uMnu Agrippa Ntombela noMnu Falithenjwa Mkhize.