BAYOKHANGISA NGESIKO LAKULELI PHESHEYA
LIBUYELA phesheya iqembu likamaskandi, Abafana bakaMgqumeni njengoba lizofulathela iNi-ngizimu Afrika ngoLwesine oluzayo lilibangise esiqhingini esiphazamise izinhlelo zeBafana Bafana zokungena kweyamanqamu ye-Africa Cup of Nations (Afcon), iSeychelles.
Iqembu lesizwe laseSeychelles elingazelwa lutho kunobhutshuzwayo, lidlale ngokulingana neBafana kuba wu-0-0 ekuhambeni ngoLwesibili, okwenza amathu- ba elakuleli okudlulela kweyamanqamu ezokuba seCameroon ngonyaka ozayo amfimfe. IBafana isalelwe yimidlalo enzima, okungoweNigeria ekhaya noweLibya ekuhambeni.
Abafana bakaMgqumeni, okunguNelisani noSakhiseni Mseleku, baya kuleliya lizwe ukuyobamba iqhaza emcimbini obizwa ngeSeychelles Festival Kroel Laserenade International de Victoria, bayoze babuye mhla ka-27 kwephezulu. Ngokusho kukaNelisani, kulolu hambo baweliswa wuMnyango wezo- kuThuthukiswa koMnotho nezokuVakasha KwaZulu-Natal ukuya kulesi siqhingi esibalwa neziwu-115 ezibizwa nge-Archipelago, empumalanga ne-Afrika.
Uthe konke abakwenzayo benzela ukuphakamisa igama likamzala wabo, uKwakhe "Mgqumeni" Khumalo, iBhova likaDikadika. “Umsebenzi weBhova kawuzange ufinyelele phesheya, kuwumsebenzi wethu ukuqhakambisa umlando walo. Sijabule kakhulu ukuthola leli thuba ngoba kusho ukuthi uhulumeni kukhona okubonayo kithina,” kusho uNelisani.
Okhulumela Ezokuvasha KwaZulu-Natal, uNkk Nhlanhla Sibiya, uthe banobudlelwano obuqinisile neSeychelles, bathole isimemo ngomcimbi omkhulu ozobe wenzeka khona njengoba bakhangisa ngalesi sifundazwe kwamanye ama- zwe. “Sitshele uMnyango wezobuCiko namaSiko KwaZuluNatal ngalesi simemo kwaba yiwona osihlonzela Abafana bakaMgqumeni ukuyokhangisa ngesiko lakuleli eSeychelles,” kusho uNkk Sibiya. Okhulumela uMnyango wezobuCiko naMasiko KwaZulu-Natal, uMnu Mthobisi Makhathini, uthe banalo ulwazi ngalolu hambo.
Leli qembu liya eSeychelles nje, ngoNhlangulana (June), beliseRussia liweliswe wuMnyango wezobuCiko namaSiko eMpumalanga.
Liya eRussia nje, belisanda kuqukula indondo yeBest Masikandi kwiSouth African Music Awards (Sama) nakwiCrown Gospel Awards. Ngenyanga edlule lihlomule ngezindondo ezimbili kwiSouth African Traditional Music Achievements Awards (Satma), okungeyeBest Male neBest Masikandi.