Badiniwe ngotholwe entanta edanyini
Basola onogada bepulazi ngokufa kwakhe
UYAVEVA yintukuthelo umphakathi waKwaHlomendlini, eMandeni, emuva kokutholakala kwesidumbu sowesilisa obeyodoba ngokungemthetho edanyini elisepulazini elikule ndawo, sintanta emanzini ngoMsombuluko.
Umphakathi usola inkampani yonogada eqapha amapulazi kule ndawo ngokufa kukaMnu Sibusiso Jabulani Msimango ( osesithombeni).
ILANGA lithole ukuthi ngosuku agcine ukubonakala ngalo esaphila umufi, umnikazi wepulazi, iLuyanda, uMnu Bheki Ncayiyana, ubize onogada ngesikhathi embona edoba edanyini elisepulazini lakhe, emuva kwalokho akabange esabonakala.
Okunye okwenza umphakathi uthukuthele wukuthi isidumbu sitholwe sinezimpawu zokushaywa njengoba kuthiwa besilimele, kusolwa onogada.
UNkz Samukelisiwe Makhoba, ongunina wengane kamufi, futhi obehlala naye, uthi uMnu Msimango uhambe endlini ekuseni eyodoba njengoba bekuyinto ajwayele ukuyenza. Okumenze wasola ukuthi kukhona okungahambi kahle, wukubona kudlula isikhathi ajwayele ukubuya ngaso uma kade eyodoba.
“Ngakusasa ngivuke ngaya ekhanseleni lendawo ngiyobika ngokungabuyi kwakhe ekhaya, langiyalela ukuba ngiyobika emaphoyiseni.
“Sengikwenzile lokho, ngithinte amalungu eCommunity Policing Forum nawo ngawachazela. Kube sekuyiwa edanyini leli ekade edoba kulona. Bathole udobo lwa- khe nobhakha wakhe obunezinhlanzi ezimbili phakathi.
“Kuvele ukuthi ngesikhathi edoba, umnikazi wepulazi umbonile wabe esebiza onogada. Siqhubekile nokubheka, isidumbu sakhe saze sathokalala ngoMsombuluko ntambama sintanta emanzini,” kusho yena.
Uthi singakatholakali isidumbu, onogada babiziwe bathi kabazange bamfice umufi edanyini.
“Okusixakayo wukuthi bakhuluma izinto ezingafani ngoba sekuhlanganwa nabo okwesibili, basitshele ukuthi bambonile umufi kodwa wabaleka. Sifuna nokwazi ukuthi ulinyazwe yini ebusweni,” kusho yena.
UMnu Ncayiyana uthi kuyimanje uyesaba ukulala kuleli pulazi njengoba kunamalungu omphakathi amsongelayo ngoba emsola ngokuba nesandla ekufeni kukaMnu Msimango.
“Mina ngibize onogada emuva kokubona umuntu odobayo njengoba ngijwayele ukwenza. Bafikile kimina ngabe sengiyabatshengisa nabo bambona ukuthi umi kuphi, baya kuyena. Kabazange babuyele kimina, ngize ngabashayela ucingo ngifuna ukuzwa ukuthi bamtholile yini. Bangitshele ukuthi kabamtholanga kodwa bafice ubhakha wakhe kuphela. Ngigcine ngaleso sikhathi ukukhuluma nabo,” kusho yena.
Uthi naye ukhathazekile ngokuphuma komphefumulo kangangoba uzimisele ukubambisana nomndeni ngezindleko.
Okhulumela amaphoyisa, uCapt Nqobile Gwala, uthe kuvulwe idokodo ngokufa komuntu, uphenyo lusaqhubeka.