Bazobhalela endaweni eyimfihlo
Abazali bafuna kubuyiswe u-
BAZOFUNELWA indawo ephephile yokubhalela izivivinyo zokuphela konyaka abafundi bakamatikuletsheni baseMashiyamahle High School, eNdwedwe, ngenxa yokulwa kwabazali asebetshele umnyango wezemfundo ukuthi ngeke kubhalwe uma engabuyiswa uthishanhloko, uMnu Mthembeni Ntanzi, omiswe ngesonto eledlule.
UMnu Kwazi Mthethwa, okhulumela uNgqongqoshe wezeMfundo KwaZulu-Natal, uthe ngeke kubhaleke kulesi sikole ngoba kulokhu kufika abazali.
“Umphakathi kawuthinteki odabeni lukathishanhloko ngoba yena uyawazi amacala akhe nomqashi wakhe. Ngenxa yokuthi sesitholile ukuthi abantwana bayafuna ukubhala, kodwa umphakathi kawufuni, sesinqume ukubasusa bonke kulesi sikole, kodwa ngeke siyidalule indawo abazobekwa kuyona,” kusho uMnu Mthethwa.
Umnyango ubusudalule nokuthi kuzothunyelwa abazogada izivivinyo kulesi sikole ngesikhathi kubhalwa ngoba kwabona othisha bahlukene phakathi.
Ngakolunye uhlangothi, uMnu Elijah Mhlanga, okhulumela uMnyango wezeMfundo eyisiSekelo, uthe izinkinga kulesi sikole zidalwe wukuthi kakusebenzeki nothishanhloko. Incwadi etholwe nguthishanhloko ngesikhathi emiswa, ithi uphazamisa ukusebenzisana phakathi kwesikole nomnyango.
Umiswa nje, ekupheleni kukaNcwaba (August) iNhloko yoMnyango wezeMfundo KwaZuluNatal, uDkt Enoch Nzama, nezikhulu zomnyango, bebehambise imiphumela yabafundi abebefunda kusona ngo-2014, ebibanjwe ngoba besolwa ngokukopela bavalelwa ngaphakathi.
Abafundi banqaba ukuyemukela, bathi kabayifuni isihlanganiswe neyezichibelo zalezi zifundo okwakuthiwe mabaziqale phansi.
Kusolwa ukuthi uMnu Ntanzi akakhombisanga ukubambisana nomnyango ngesikhathi abafundi benqaba ukwamukela imiphumela.
Akangenelelanga, okwenza umnyango usole ukuthi unesandla ekunqabeni kwabo.
Inkinga yakulesi sikole iqale ngo2014 lapho kubanjelwe khona abafundi bakamatikuletsheni imiphumela yabo besolwa ngokukopela iMaths, i-Accounting, iLife Sciences nePhysical Science kwase kubanjwa yonke imiphumela.
Ngenxa yalezi zinsolo, baphenywe isikhathi eside abafundi esifundeni iLembe, kwathiwa mabaziqale phansi lezi zifundo. Kuyona yonke le minyaka, ibilokhu ibanjiwe imiphumela.
Ngo-2015 izikhulu zomnyango zihlangabezane nezimbila zithutha ziholwa ngemhlophe phambili, ngesikhathi ziye kulesiya sikole, ziyokwenza uphenyo, abafundi bavele bashaya izimoto zazo zaphihlika amawindi, zashiswa.
Abafundi okumele babhale kulesi sikole bangaphezulu kuka-200. Phambilini uMengameli weNational Teachers' Union (Natu) - uMnu Ntanzi, ayilungu layo - uMnu Allen Thompson, uthe bazolwa nale ncwadi yokumiswa kwakhe ngoba izizathu zayo kazizwakali.
Uthi lokhu okwenziwe wumnyango wezemfundo kuyimizamo yokudayisa izikhundla kulesi sikole nokubheca uthishanhloko ngobende inyama engayidlanga. mthobisis@ilanganews. co.za