Kudinwe ijaji kwelikaMzolo
Umsolwa uphinde walaxaza ummeli
ZINGASE zifinyelele ku-R200 000 izindleko zecala lokubulala elethweswe uMnu Thabani Mzolo (23), osolwa ngokudubula abulale uNkz Zolile Khumalo obeyisitshudeni eMangosuthu University of Technology (MUT) njengoba esephinde walaxaza ummeli, wazifunela ozokhokhelwa yizihlobo zakhe.
Lezi zindaba zivele eNkantolo eNkulu yaseThekwini ngoMsombuluko ngesikhathi iJaji, uNkk Sharmaine Bolton, noMnu Mzolo beqagulisana ngenkulumo enkantolo.
UMnu Mzolo uthe useyamhoxisa ummeli wakwaLegal Aid, u-Adv Amanda Hulley, obekungokwesithathu eshintsha abameli.
UMshushisi, u-Adv Nadira Moosa, utshele inkantolo ukuthi uMnu Mzolo uthi usethole ummeli omusha, onguAdv Kay Augustine, waseMtshezi.
Kube ugadlile ejajini limbuza ukuthi uyazi yini ukuthi usechithe isikhathi senkantolo esingakanani elokhu eshintsha abameli.
“Wena ushiywe ngummeli ngoba wehlulekile ukumkhokhela, usuzoyithathaphi-ke manje eyokukhokhela lona? Zithini izinhlelo zokukhokhelana nalona osekhona? Uyazi yini ukuthi leli cala lihlelelwe ukuba liqulwe amasonto amabili, okungenzeka likudle imali engaze ifinyelele ku-R200 000? Leli cala linofakazi abayizitshudeni, okumele babe nesikhathi sokuyobhala izivivinyo zabo zokuphela konyaka,” kusho ijaji ngokunengwa.
UMnu Mzolo uphendule wathi: “Ekuqaleni kangishongo ukuthi ngifuna ummeli kahulumeni, kwasho ummeli wami, engakhulumanga nami. Nginesiqiniseko sokuthi umndeni wami uzokwazi ukumkhokhela u-Augustine.”
Ijaji liyiguqisile inkantolo kusayobhungwa, ummeli omusha eshayelwa ucingo. Ibuye yahlala inkantolo, umshushisi wabika ukuthi usevumile ummeli omusha ukuthi uzolithwala icala uma sebemkhokhele imali ngaphambi komhla ka-13 kuLwezi (November).
Ijaji linqume ukuba icala libuyele enkantolo mhla ka-13 kuLwezi kuzozwakala ukuthi imali iyatholakala yini. Icala liyobe seliqala ukuqulwa mhla ka-12 kuya ku-27 kuNdasa (March) ngonyaka ozayo.
“Ngikunika ithuba lokugcina ngci Mzolo lokuba kuhlehle leli cala. Nangu ummeli wakwaLegal Aid ukhona, ngeke uphinde ube nezaba ngokuzayo. Uzobuyela uyolinda ezitokisini,” kusho iJaji Bolton.
Sekuphuma inkantolo, ILANGA likhulume noMnu Mthembeni Majola - oyikhansela leNkatha Freedom Party ku- ward 18 eSigodlweni, eMtshezi - ongumakhelwane futhi oyisihlobo sikaMnu Mzolo, okunguye othole ummeli omusha futhi azomkhokhela, uthe: “Ngithanda kucace emphakathini ukuthi lesi sinyathelo esisithathayo sokukhokhela lo mfana akukhona ukuthi siyamvuna kulesi senzo esibi esenzekile futhi sizwelana kakhulu nomndeni wakwaKhumalo olahlekelwe yindodakazi yawo.
“Akusho futhi ukuthi simkhokhela ngoba siyizimpunyela, kepha sikhathazekile sonke siwumndeni ngalesi senzo. Sizibuza umbuzo wokuthi yini lena eyenze umfana esimazi njengohloniphayo nobukhali ezifundweni - obebuye akwazi ngisho ukufundisa abanye - kuthiwe wenze isenzo esinje.
“Sixakwa nawukuthi ngesikhathi kwenzeka lesi senzo, kuthiwa wazinikela yena emaphoyiseni. Konke lokhu kusishiye nemibuzo eminingi. Yingakho-ke sithe ake sithole ummeli esizomkhokhela, ozogubha yonke ingonyuluka ngalesi sehlo, siqhathanise ngisho nalokhu yena asitshela khona nokuzoshiwo ngofakazi. Siyobe sesijaja ekugcineni ukuthi ngabe lesi senzo wasenza eseqala ukungenwa wumoya wobukhotheni noma wenkolo kaSathane.
“Siye sizwe kaningi abantu abasuke bemelwe ngabameli abangakhokhelwa ukuthi uma amacala abo esedluliselwa ezinkantolo ezinkulu, kuguqulwa izigwebo, thina sifuna leli liqulwe liphele nya, kungamosheki imali kahulumeni.”
Ebuzwa ukuthi ucabanga ukuthi uzobe eseyiphelelise nini imali kaAdv Augustine, usho kalula wathi: “Iyobe isihlangene yonke cishe mhla ka-10 kuZibandlela (December).”
UMnu Majola ukuqinisekisile ukuthi uMnu Mzolo uyintandane, unodadewabo omelamayo, osazama amatoho. Uthe ekhaya kusaphila uninakhulu osekhulile.
Kulokhu uMnu Mzolo ubebukeka ebuyelwe yithemba kunangesikhathi egcina ukuvela enkantolo ngoMsombuluko odlule.
Bebengekho abakwaKhumalo enkantolo, zingekho nezitshudeni zaseMUT .