Ubheke imiphumela emihle kuMatric
UNkk Angie Motshekga uthi benze izinhlelo ezinqala ukuletha umehluko
ULINDELE umehluko omkhulu emiphumeleni yezivivinyo zikamatikutsheni uNgqongqoshe wezeMfundo eyisiSekelo, uNkk Angie Motshekga, ngenxa yezinhlelo ezinqala ezenziwe yiminyango yezemfundo ezifundazweni ukuqinisekisa ukuthi liyakhuphuka izinga lokuphasa uma kuqhathaniswa nanyakenye.
Okhulumela umnyango, uMnu Elijah Mhlanga, uthi izinhlelo ezethulwe yiminyango yezifundazwe zinika ithemba kakhulu.
Usho lokhu nje, uMnyango wezeMfundo KwaZulu-Natal uqhamuke nohlelo lokuthatha abaqondisi bezifunda nothisha ababukhali ezifundweni ezithathwa njengezibalulekile, babahlanganise nabezifundazwe ezivamise ukuqengqeleza phambili uma sekuphume imiphumela ngenhloso yokucobelelana ngolwazi.
NgoMsombuluko kuzobe kubhalwa izilimi ezingeyona impoqo kubona bonke abafundi kanti ngoLwesibili kubhalwa iphepha lesiNgisi ezweni lonke jikelele.
Bawu-796 542 kuzwelonke abafundi abazobhala izivivinyo. Bawu-629 141 ababhala ngokugcwele kanti abawu-167 401 ngeke babhale ngokugcwele ( part-time). Abazomaka amaphepha bawu-44 505 kuzwelonke, izikhungo zoku- bhalela izivivinyo ziwu-6 888 kanti ezokumaka amaphepha ziwu-141.
Umnyango njengoba sewethule iSign Language, bawu-58 abafundi abanenkinga yokuzwa abazobhala lesi sifundo ezikoleni eziwu-10 kuzwelonke.
UMnu Mhlanga uveze nokuthi njengoba ukubhalwa kwezivivinyo kuzophothulwa mhla ka-28 kuLwezi (November), kulindele ukuba ukumakwa kwamaphepha kuqalwe mhla ka-1 kuZibandlela (December).
“Izifundazwe ezinkulu zona zizosheshe ziqale ukumaka amaphepha lungakashayi lolu suku ukuze kushaye umhla ka-15 kuZibandlela sekuphothulwe konke,” kusho uMnu Mhlanga.
UNgqongqoshe wezeMfundo KwaZulu-Natal, uMnu Mthandeni Dlungwana, uthe lesi sifundazwe sesikulungele ukubhekana nezivivinyo. Uthe baqale nyakenye mhla ka-30 kuLwezi ukuqinisekisa ukuthi kulo nyaka bayalikhuphula futhi izinga.
Umqondisi wokubhalwa kwezivivinyo KwaZulu-Natal, uMnu Bunny Mthembu, uthe zintathu izikole ezibhala iSign Language kulesi sifundazwe njengoba kuwuhlelo olusha.
Bawu-152 747 abafundi abazobhala ngokugcwele KwaZulu-Natal kanti bawu-34 980 abangeke babhale ngokugcwele.
“Sizibekele ukuba umnyango wethu unyuke ngo-7% kuya ku-10% kulo nyaka, kanjalo nesifunda ngasinye sifuna sinyuke ngo-7% kuya phezulu. Sithe kasifuni ngisho esisodwa isikole esizothola u-0% kulo nyaka. Ezithole u-100% nyakenye, sifuna ukunyusa isibalo sazo ngo-5%. I-Maths sizibekele ukuthi kumele inyuke ngo-5% siphinde sikhuphule ama- bachelor ngo-5%,” kusho uMnu Mthembu.
Uthi sinyukile isibalo sabafundi besifazane abazobhala njengoba bewu-83 958 kanti abesilisa bawu68 788. Ziwu-26 izikhungo zokumakela kulesi sifundazwe, awu-1 963 421 amaphepha azomakwa uma bebhale bonke abafundi.
Ukumaka kuqala mhla ka-26 kuLwezi KwaZulu-Natal kuze kube mhla ka-14 kuZibandlela. Bawu-7 481 abazomaka, awu-74 ama- chief marker, awu-1 496 ama- senior marker, awu-214 ama- deputy marker kanti imiphumela izophuma mhla ka-4 kuMasingana (January).
Bheka ikhasi 20