UBONGA AKAQEDI OPHOTHULE IZIQU
AKAWUVALI umlomo owesifazane ozalwa emndenini ohlwempu, ocishe waphuthwa yithuba lokuyofunda enyuvesi esethathiwe, okumanje useyi-Archaeologist ngenxa yosizo lomfundaze kaMnu Bahle Zondo, i-Amahle Benefit Scheme - ILANGA elike laloba ngaye.
UNkz Nondumiso Hlela (24) wase-Orange Farm, eGoli, kodwa osezinze eSoweto - khona eGoli - uneziqu kwi-Archaeology okuwumkhakha ongajwayelekile, ogxile kwezokucwaninga njengoba kuwo kukhona abacwaninga ngabantu, amathambo nangokubala.
Kumthathe iminyaka emithathu ukuziphothula e-University of Pretoria. Kumanje usebenza enkampanini exhasa amabhizinisi asafufusa, iBusiness Partners Limited, athi umsebenzi wakhe wukucwaninga ama- business plan ukuthi abhalwe kahle yini futhi anganikwa yini uxhaso lwemali ayifunayo noma cha.
“Kulo msebenzi kudingeka ukwazi ukubala nokubhalansisa, kungenjalo, ungagcina sewuwisa inkampani ngokuphasisa amapulani amabhizinisi angeke aphumelele,” kusho uNkz Hlela.
“Umama nguye kuphela obesebenza ekhaya, ubaba engasebenzi. Kuthe uma ngizwa ukuthi i-Amahle Benefit Scheme iyasiza ngemifundaze kwabaswele, nami ngafaka isicelo, ngenhlanhla ngaqokwa.
“Umfundaze ungixhase ngemali yokubhalisa, eyokufunda, wukuthenga izincwadi nendawo yokuhlala. Imali ebenginikwa yona ngonyaka bewuku-R50 000,” kusho uNkz Hlela.
Uthi lo mkhakha angene kuwona ubalwa neminye okushoda kakhulu kuyona abamnyama abawenzayo.
“Izinkampani eziningi zigcina sezithatha abantu abangawufundele ngoba bancane kakhulu abawufundele. Ngibonga kakhulu kuMnu Zondo ngokunginika ithuba lokufezekisa iphupho lami,” kusho uNkz Hlela othi ngemuva kokuthola iziqu, uthole umsebenzi wakwazi nokushintsha impilo yomndeni wakhe.
NgeSonto eledlule uMnu Zondo unikele ngo-R1 million esifundazweni iMpumalanga, exhasa abafundi abawu-10 ngomfundaze.
Eminyakeni ewu-11 yasungulwa i-Amahle Benefit Scheme, isikhiphe u-R36 million wemifundaze ukulekelela abafundi.
“Inhloso yethu ngokunikela ngalolu hlobo, wukuthi sibone abantu abamnyama bethuthuka ngokwemfundo. Ukubabona befezekisa amaphupho abo, bekhipha nemindeni yabo ebubheni njengoba kwenzekile kuNkz Hlela, yikho okusiphushayo ukuba sixhase nabanye,” kusho uMnu Zondo.