E-MARGATE KUZOKWANDISWA IZINDIZA EZIYA EGOLI
ZIZOKWANDISWA izindiza ezisuka esikhumulweni saseMargate zilibangise eGoli njengoba kusondela amaholidi kaZibandlela (December). Lokhu kuzokwandulelwa wumcimbi wokugubha iminyaka ewu-5 lesi sikhumulo sisebenza, ozokuba ngoLwezi (November).
Njengamanje kundiza ezimbili ngosuku, kanti kulindeleke ukuba zibe zine, ukuhlinzeka izivakashi ezithutheleka kule ndawo ngamaholidi.
Lezi zindaba zivezwe yiMenenja kaMasipala iRay Nkonyeni - ongaphansi kowesifunda, uGu - uMnu Sihle Mbili.
Ukuba khona kwalesi sikhumulo ngenye yezinto ezenze lo masipala wahlabana ngendondo yeBest Run Municipality kwathi uMnu Mbili yena wagoduka neBest Municipal Manager kwiPremier's Excellence Awards nonyaka.
Lo masipala, owakhiwe ngokuhlanganiswa komasipala ababili, okuyiHibscus neziNqoleni, uthola le ndondo nje, akukapheli sikhathi esingakanani uthole umbiko ongenagcobho ekucwaningweni kwamabhuku wango-2015/2016.
Ekhuluma neLANGA uMnu Mbili, uthe ukuba khona kwalesi sikhumulo kuwuthuthukisa ngezindlela iziningi umnotho kumasipala wabo njengoba sekulula ezivakashini ezifike zishiye imali ukuba zifinyelele kuwona.
“Le ndawo yethu isiyisizinda sezokuvasha. Abantu abaningi bebegcina ngokuphelela eThekwini, bangezi ngapha ukuzobona ubuhle bendawo yethu ngenxa yokuthi abengekho amabhanoyi asuka eGoli eze ngqo lapha. Kulesi sikhathi sonyaka lapho sekusondela amaholidi kaKhisimusi, amabhanoyi siye siwandise ngoba baningi abantu abasuke bethutheleka lapha‚” kusho uMnu Mbili.
UMnu Mbili, ojoyine lo masipala ngo-2013, uthi ukusebenza ngokubambisana yikho okubenza bakwazi ukuba wumasipala othela izithelo ezinhle.
Uthi ukunqoba lo mklomelo akusiyona into elula ngoba kawuvotelwa ngabantu, kodwa kuba ngamajaji akhetha omasipala abawu-5 abathole umbiko ongenagcobho iminyaka ilandelana, bese kukhishwa obaqwaqwade ema- khanda kwabalandele imigomo yeBatho Pele nemigomo yeBack to Basics - okuyizinhlelo zikahulumeni ezigqugquzela ukubekwa phambili kwemiphakathi uma kukhulunywa ngezidingo.
“Uma amajaji esehlonza ozowina, ahambela bonke labo masipala abaqokiwe, abheke ukuthi bayifeza kanjani imigomo yeBatho Pele nakho konke okunye abasuke bekubheka befuna nokuthi okushoyo ukweseke ngobufakazi,” kusho uMnu Mbili.
Uthi okubasize kakhulu kulo masipala wabo - akholwa ukuthi kungabasiza nabanye abadonsa kanzima - wukuqasha abantu abafanele ezikhundleni nokusebenzisana okuhle phakathi kwakhe nehhovisi lemeya.
“Umbiko ongenagcobho akusiyo into ongayenza ngobusuku obubodwa, kodwa yinto oqala ukuyisebenza ngesikhathi uthola ibhajethi kuze kuphele lowo nyaka wemali,” kusho yena.
Okunye akuvezile wukuthi basebenzisana kahle nomphakathi ngoba njalo uma bethola ibhajethi, baqala kuwo bayozwa ukuthi yini odinga ukusizwa kuyona.