Ukhuthazwa ngunina yize esekobandayo
Uthi empilweni ugqugquzelwe ngunina ongasekho. Ngesikhathi ekhula ubeqaphela indlela unina abeziphethe ngayo aphinde emukele ngayo abantu.
“Ubenezwi eliqinile futhi elinesigqi, engesabi ukusho lokhu akholelwa kukhona - yize kunjalo ubesho akuhlosile ngendlela engasabisi. Yikhona lokhu okungenze ngaba nesibindi sokuba ngowesifazane ongesabi ukungena khaxa emkhakheni wamahlaya, obuwaziwa njengowabesilisa.
“Yisona lesi sibindi futhi esingenze ngakhuluma ngokungesabi ngesikhathi ngiqashwe esiteshini somsakazo seAfrikaans,” kusho yena.
Kule ncwadi wenaba kabanzi ngaleso simo, yingozi yemoto abe kuyona, ukungcofwa ezinkundleni zokuxhumana, ukuphenduka inhlekisa ngomzimba wakhe ngesikhathi esengumethuli we-Our Perfect Wedding noginqigonqo ebudlelwaneni bakhe nomyeni wakhe uMpho Osei Tutu.
Kuzona zonke lezi zingqinamba uthi ubezwa umnkenenezo wezwi likanina ebelimqinisa, lamenza wakwazi ukubhekana nazo.
“Njengomuntu osemehlweni abantu besekukaningi ngithola izicelo zokuba ngenabe ngempilo yami. Ngibone kukuhle ukuba ngikwenze lokhu ngokukhumbula lokho engakufundiswa ngumama.
“Lena yindlela yokumhlonipha nokumbonga ukuthi ungikhulise ngendlela engenze ngakwazi ukuzimela.
“Kungithathe isikhathi ukuba ngicabange indlela okumele ngethule ngayo udaba lwami kangangoba umcabango ongifikele kuqala ngowokuyethula esteji njengehlaya.
“Ukuba ngowesifazane okhule ezungezwe ngabanye abaqotho kungenze ngaba nomqondo osabalele, kwangenza ngaziqonda nokuthi ngingubani. Uthando lukamama kimina lusavutha amalangabi.
“Le ncwadi iyindlela yokumhlonipha nokumenza azi lapho elele khona ukuthi izimfundiso zakhe kimina kazibanga
yize,” kusho yena.
Mayelana nokwembuleka kwethalente elisha emgodleni wakhe uthi: “Ngithobeke kakhulu ngakho ngoba nami bengingakulindele lokhu. Ngiyaziqhenya ukuthi ngiphumile ekopini abaningi abebengivalele kulona.”