AYANDA BUTHELEZI
IZINDABA ezivele ngenyanga edlule zokuthi abenkampani ekhiqiza izimoto zaseGermany, iVolkswagen (VW), ngeke besaqhubeka nokukhiqiza uhlobo lwemoto iBeetle, eyaduma ngama1960s ngaphambi kokuba ibuye isinomzimba omusha eminyakeni embalwa edlule, zimangaze abaningi abangabathandi balolu hlobo lwemoto engena ngaphansi kohlu lwezimoto ezingama- classic cars.
Lezi zindaba zokuthi abakwaVW bazogcina ngoJuly ngo-2019 ukukhiqiza iselesele, okuyigama le moto ebizwa ngalo eNingizimu Afrika, zisabalale ngoSeptember.
ILANGA lishicilele kuleli sonto engu-21 kuphela amaselesele asele emagaraji adayisa izimoto kuleli, ngokusho kukaSiyanga Madikizela osebenza kwezokuxhumana kwaVolkswagen, eGoli.
Uthe ukusabalala kwezindaba zokuthi ngeke kusaqhutshekwa nokwakhiwa kwalezi zimoto kakubashayanga kuma- sales, kunalokho lithe ukwenyuka kancane izinga lokuthengwa kwazo.
IBeetle eyakhiwe kabusha “New Beetle” yethulwe ngo-1998, kanti kubikwa ukuthi yenze kangcono emakethe - kwadayiswa angu-500 000 emhlabeni wonke kusukela ngaleso sikhathi.
Kubikwa ukuthi kwamanye amakhasimende ibenedumela kodwa kayizange isivale emqondweni yabaningi isikhala seBeetle endala engungqo.
Ngokusho kukaJeff Osborne, oyiGumtree SA head of automotive, kwiBusiness Tech, isinqumo sabakwaVW singase senyuse i- value yohlobo lwe-Beetle engungqo.
Kubikwa ukuthi lesi sinqumo sokuqedwa kokwakhiwa kwalezi zimoto sithathwe ngemuva kokuba le nkampani ikhetha ukukhiqiza izimoto ezisebenza ngogesi ngethemba lokuheha leso sizukulwane esikholelwa kakhulu ekunakekelweni kwemvelo, okuyisizukulwane salabo abangabathandi be-Beetle yawo1960.
IBITHANDWA NAYINTSHA I-BEETLE
Ukwethulwa kabusha kweBeetle ngo-1998 kuhehe nentsha ethanda izinto ezehlukile nezisemgangathweni njengoNkz Sandi Msimango wasePinetown osebe nayo iminyaka emithathu.
Uthi okumchaza kakhulu ngemoto yakhe eyimodeli ka-2005 wukuthi inesitayela futhi yehlukile.
“Ngingumuntu othanda isitayela, yingakho ngikhethe yona. Kunomuzwa wentokozo engiwutholayo uma ngiyishayela ikakhulukazi uma sengibambezeleke esi
minyaminyeni sasemigwaqweni yaseGoli.
“Uzizwa usemhlabeni wakho wedwa. Angingabazi ukuthi owasungula le moto wayebeke mina emqondweni,” kusho yena.
Uthi yize zimangazile izindaba zokuthi le moto ngeke isakhiwa, uthi okumjabulisayo wukuthi uyingxenye yembijana yalabo, ikakhulukazi intsha, abasele nayo.
Uthi akazimisele ukuyidayisa ngoba kuyena ukuba nayo ikakhulukazi njengoba ingeke isatholakala kuwumlando.
“Angisiyena nomuntu onolwazi olungako ngezimoto kodwa uma yehlukile futhi inesitayela esithile esihehayo, ngiyathatheka. Engingakusho wukuthi linamandla iselesele.
Imoto yokuqala yalolu hlobo yasungulwa ngeminyaka yawo1930, kuwumbono womholi wamaNazi owayewundlovukayiphikiswa onesihluku, u-Adolf Hitler.
Ngama-1960s le moto ibingenye yezithathwa njengomfanekiso wesiqalo esisha sempilo yesitayela, yaheha amehlo abaningi ikakhulukazi kwezepolitiki.
Ngabo-1970 kwamiswa ukudayiswa nokukhiqizwa kwale moto e-United States of America (USA) kodwa yaqhubeka isatshalaliswa kwamanye amazwe.