Masifunde ukuzimela singabheki ukuqashwa
SESIFIKILE leso sikhathi sonyaka lapho kuzophela amaphupho ezinkulungwaneni ngezinkulungwane zabafundi baka- matric, njengoba kuleli sonto kuqale izivivinyo zokuphela konyaka. Noma isitifiketi sika- matric singasenaso isisindo esasinaso eminyakeni ewu-30 eyedlule, kodwa ukuphasa leli banga yisigaba esibalulekile empilweni yomfundi ngoba kuvula amathuba okuqhubekela emazingeni aphakeme, njengamanyuvesi nezinye izikhungo zemfundo.
Umfundi ophase kahle leli banga, kufana nokuthi unokhiye wokungena emasangweni angamholela empumelelweni, inqobo nje uma ezimisele ngokuqhubeka nemfundo, asebenze kanzima.
Lesi yisikhathi esihle ngoba ngisho abafundi abaqhamuka emindenini eswele, sebeyakwazi ukuthola izibonelelo zokufunda mahhala emanyuvesi, baxhaswe ngisho nangemali yokuthenga ukudla nezincwadi zokufunda.
Usizo kwezemfundo luningi ngedlela yokuthi kakufanele ngabe kukhona intsha ebalisa ngokuthi kayikwazi ukufeza izifiso zayo ngenxa yokweswela imali.
Uma sesibheka phambili, umnyango wezemfundo, ubambisene nezimboni nezinkampani ezizimele, kufanele ubuyekeze i- syllabus kuwona wonke amazinga emfundo ukuqinisekisa ukuthi imfundo yethu ibacija kahle abafundi, ibabeke emathubeni amahle okukwazi ukuthola imisebenzi nxa sebephothule izifundo zabo.
Esikhathini lapho isimo somnotho sintengantenga, imisebenzi inqabile, kufanele kube nokuxhumana nokubambisana phakathi komnyango wemfundo nezinkampani ukuze umnyango uzokwazi ukuthi izimboni zidinga maphi amakhono, abafundi bangenzi izifundo ezingeke zabasiza ngalutho nxa sebefuna imisebenzi.
Kungaba kuhle ukuba sibonele emazweni afana neJapan, iChina, iSouth Korea neGermany ukubala nje ambalwa, ukuthi ayihlela kanjani imfundo yawo ukuze nathi sikwazi ukuthuthukisa izwe lethu nabalakhele.
Iminotho yala mazwe yenza kahle kanti nesibalo sabantu abangasebenzi sincane kakhulu nxa usiqhathanisa nesaseNingizimu Afrika. Isizathu salokhu, phakathi kokunye, yizinga lemfundo eliphakeme nokukhuthala kwabantu bakhona. La mazwe agcizelela ukufundwa kwesayensi, izibalo nokuziqalela amabhizinisi ( entrepreneurship) kusukela emazingeni aphansi, okuyizinhlelo ezivulela abafundi amathuba amaningi ezifundo abangazenza ezikhungweni zemfundo ephakeme.
Lokhu kubabeka esimeni esihle sokuthola imisebenzi nxa sebeziphothulile izifundo zabo. Mkhulu umsebenzi osasihlalele kuleli ukulungisa okungahambi kahle ukuze izwe lethu lizokwazi ukufinyelela ezingeni lapho imfundo yethu iyonika izingane zethu amathuluzi okukwazi ukuzisebenza zona, zingabheki kuphela ukuqashwa yizinkampani ezinkulu. Sifisela abafundi bonke, ikakhulukazi abaku- matric impumelelo.
Agcizelela ukufundwa kwesayensi nezibalo.