Ingxabano kuPaez nomqeqeshi
Usinde engozini yemoto uManyama
KUPUTSHUKA izindaba ezithi simuncu isimo phakathi kukaGiovanni Solinas wase-Italy ongumqeqeshi weKaizer Chiefs noGustavo Paez waseVenezuela ongumdlali wale kilabhu njengoba kuvela ukuthi (lo mgadli) usefake isicelo sokuhamba ekhala ngokuthi lo mqeqeshi akamfuni.
IChiefs izobhekana neBlack Leopards kwi- last 16 yeTelkom Knockout ngeSonto ngo-15h30 eFNB Stadium, eSoweto.
IChiefs iya kulo mdlalo nje, isanda kujabulisa abalandeli bayo inqoba isicoco seMacufe Cup yehlula iBloemfontein Celtic ngo-2-0 ngeledlule eFree State Stadium.
Lo mdlalo kawuphelanga kahle njengoba uPaez ekhombise ukungamhloniphi uSolinas. USolinas ukhiphe uPaez wathi uzama ukumxhawula lo mdlali wenqaba ingcaca ekhombisa ukuthi ucikekile. Lo mdlali kubikwa ukuthi ngendlela abedinwe ngayo, ukhuzwe epakisha imithwalo yakhe ethi uyahamba ngoba uyabona ukuthi lo mqeqeshi akamfuni.
“Isimo simuncu phakathi kukaPaez nomqeqeshi, imdinile eyokuthi akhishwe ngoba ubesazimisele ngokudlala. NgoLwesibili utshele abaphathi bekilabhu ukuthi ucela ukukhululwa uma kuvulwa iwindi lokudayiselana ngabadlali ngoba uyabona ukuthi akekho ezinhlelweni zomqeqeshi.
“Into emkhalisa kakhulu wukuthi usebenza ngokuzikhandla kodwa akanakwa. Kodwa-ke lolu daba lusazohlalelwa ngoba iChiefs ilusingethe ngobunono,” kusho umthombo waleli phephandaba.
Imizamo yokuthola uBobby Motaung oyiMenenja-jikelele yeChiefs ukuba aphawule ngalolu daba, iphunzile njengoba ucingo lwakhe belukhala kodwa lungabanjwa.
USolinas uthe uyasiqonda isimo nokukhathazeka kwalo mdlali kodwake ngeke ande ngamaningi ngoba wudaba olulungiswa ngaphakathi. Ube esekugcizelela ukuthi njengomqeqeshi nguyena owenza izinqumo ngakho-ke uzoqhubeka nokuthatha (izinqumo) abona zizosiza ikilabhu.
“Engingakusho wukuthi akekho umuntu omkhulu ngaphezulu kweChiefs. Sonke silapha ukuzosebenza ngakho-ke kufanele sikuhloniphe lokho. Into emqoka kithina njengamanje wukunqoba umdlalo wethu neBlack Leopards weTelkom Knockout.
“Ukunqoba kwethu iMacufe kungisizile ngoba ngikwazile ukubona nabanye abadlali bethu abangavamisile ukuthola ijezi,” kusho uSolinas.
IChiefs ibambe umoya ngoLebohang Manyama ogingqike nemoto ngoLwesibili esuka ejimini eNaturena, eGauteng, elibangisa kubo.
Imoto yakhe yohlobo lweBMW isale iyigobolondo kodwa waphuma kuyona elimele edolweni nasendololwaneni.
Kuthiwa odokotela basazosibheka isimo sakhe ngoba ubukeka ethukile.