OweBucs uphazanyiswa yiSoweto Derby
Lokhu kukhathaza uMicho ngaphambi koweTelkom
UMILUTIN “Micho” Sredojevic ongumqeqeshi we-Orlando Pirates unovalo ngomdlalo womkhaya neKaizer Chiefs njengoba ekholwa wukuthi ungase uphazamise imiqondo yabadlali bakhe kowenkomishi.
IBucs izobhekana neChippa United kwi- last 16 yeTelkom Knockout ngoMgqibelo ngo-20h15 e-Orlando Stadium, eSoweto. Emuva kwalo mdlalo, iBucs izokube isibhekana nendumezulu yomdlalo womkhaya neChiefs kwiligi obhekwe ngabomvu ozokuba ngoMgqibelo womhla ka-27 kwephezulu ngo-15h30 eFNB Stadium, eSoweto.
Lo mdlalo womkhaya sekuqaliwe ukukhulunywa ngawo njengoba la makilabhu ezotholana ephezulu kwi- log okuyinto osekunesikhathi eside yagcina ukubonakala. IPirates isendaweni yesibili, iChiefs ihleli kweyesithathu. Amathikithi owomkhaya aqale ngeledlule ukudayiswa.
USredojevic uthi ubhekene nenkulu inkinga njengoba abadlali bakhe abaningi bezokube beqala ukugijima kulo mdlalo womkhaya.
Uthi ubabona ebusweni ukuthi into eduma emakhanda abo yilo mdlalo womkhaya ukwedlula oweTelkom. Uthi kufanele azame ukuyilwa le mpi ngoba bayasidinga isicoco seTelkom.
Kubadlali bePirates okubhekwe ukuba bagijime umdlalo womkhaya okokuqala kungabalwa uLinda “Figo” Mtambo, uBen Motshwari noPaseka Mako abafike ekuqaleni kwesizini kodwa asebengumgogodla wale kilabhu. UMotshwari akakufihlanga ukuthi kayikho into ayilangazelele njengokudlala neChiefs kunezihlwele ezingu-90 000 enkundleni. Yiyo kanye-ke le nto ekhathaza umqeqeshi wePirates.
“Umdlalo womkhaya ngikholwa wuku- thi mukhulu ukuyedlula yonke into ngendlela onamandla ngayo. Lo mdlalo weTelkom ufike ngesikhathi esibi kuza umdlalo womkhaya. Iyangihlupha le nto emoyeni. Kodwa-ke kufanele sizame ukuyilwa emiqondweni yabadlali yize kuzokuba nzima, kusho uSredojevic.
Uqhube ngokuthi balindele umdlalo onzima kakhulu kwiChippa.
“Silindele umdlalo oseqophelweni eliphezulu kwiChippa ikakhulukazi njengoba inomqeqeshi obazi kahle abadlali bethu. Kodwa-ke kuzofanele silwe ngawo wonke amandla ukuwunqoba lo mdlalo,” kusho uSredojevic.
U-Eric Tinkler ololonga iChippa, oke wasebenza kuyona iBucs, uthi usazi kahle isimo esi
bhekene noSredojevic. “Ukudlala umdlalo omqoka njengalona ekubeni ubheke kowomkhaya kunzima ngoba imiqondo yabadlali igxila (kakhulu) kulo womkhaya. “Kunzima ukubayala abadlali, usuke sewenza nje kodwa kunzima ngoba wonke umuntu usuke elangazelele ukuba yingxenye yawo akekho ofuna ukuthi umphuthe. Kodwa-ke thina siyakwazi esi- kuyela kulo mdlalo. Ngeke siyingene eyesimo sabo, kasihlangani naso. Bazosifica sibahlomele nxa zonke ngoba siyayidinga nathi le nkomishi,” kusho uTinkler.