Kugawula izembe kwaboZalo
BAZULELWA ngamanqe abalingisi abaqavile emdlalweni owuchungechunge uZalo, olukhonjiswa kwi-SABC 1 ngo-20h30 ebusuku kusukela ngoMsombuluko kuya kuLwesihlanu.
ILANGA lihabule ngemithombo yalo eyahlukene ukuthi lisengcupheni ikusasa labalingisi okubalwa uGlen Gabela odlala indawo kaPastor Mdletshe, uNompilo Maphumulo odlala ekaNosipho, uNocxy Mabika odlala ekaThobile noNaymaps Maphalala odlala ekaMxolisi.
Leli phephandaba lithole ukuthi kuyaphela ukuqoshwa kwesizini yesine yalo mdlalo ngomhla ka-29 kwephezulu kanti izingxoxo zezinkontileka nabalingisi seziqalile.
Umthombo ongaphakathi uthi sebetsheliwe abanye balaba balingisi ngokuphela kwezinkontileka zabo njengoba abanye bencishiselwe izikhathi zokuqopha.
“Babizelwe ehhovisi elikhulu batshelwa ngekusasa labo emdlalweni, kanti abanye sebezoqopha uma bebiziwe kuphela,” kusho umthombo.
Omunye umthombo uveze ukuthi isizathu sokuchithwa kwalaba, wukuthi izindawo abazidlalayo kazisenawo umsoco, okwenze ababhali bazibuyekeza.
“Ngokwababhali, bafuna kuphele ngomndeni wakwaMdletshe njengoba kuzosala uGabisile (Baby Cele) kuphela. Ne- salon (okugqame kuyona uThobile) sekuzoba yindawo ezovela ngokuthi gqwa gqwa,” kusho umthombo wesibili.
Okhulumela lo mdlalo, uMarang Setshwaelo weDreamcatcher, uthe okwamanje bamatasa ngokuphothulwa kwale sizini futhi balungiselela ukuqala kwelandelayo. “Uma ababhali nethimba eliqophayo sebesithathile isinqumo ngokuzokwenzeka kulo mdlalo, sizobe sesimemezela ngokuzokwenzeka ngesizini 5,” kusho uMarang ngesitatimende asithumele kuleli phephandaba. Lo mdlalo usanda kumenyezelwa njengohamba phambili ngababukeli eNingizimu Afrika njengoba uqophe umlando ngokuba nabangaphezulu kuka10 million. Kuzokhumbuleka ukuthi usushiywe yinqwaba yabanye abalingisi abanohlonze. Phakathi kwabo kubalwa uBheki Mkhwane, uMpumelelo Bhulose, uKay Sibiya, uSihle Ndaba, uDon Mlangeni noLeleti Khumalo.