UBOSHIWE 'OBULALE' IKHEHLA NGENQINDI
ZIYIKHALELE inyanga-mthandazi yaKwaNodwengu, eNdwedwe, esolwa ngokushaya ikhehla elingumakhelwane ngoba ilisola ngokuthi lipanse umkalo.
Le nyanga-mthandazi - esingeke siyidalule njengoba silobe ingakaveli enkantolo - kuthiwa ishaye kanzima uMnu Mandlenkosi Luthuli (70), ofihlwe ngempelasonto eyedlule.
Iboshwe ngoLwesibili ntambama ngemuva kokuba umndeni kaMnu Luthuli uzwakalalise ukungenami ngokuchanasa kwayo, uthi kawazi ukuthi kwenziwa yini ingaboshwa.
Umndeni kaMnu Luthuli uthi namanje usakhungathekile ngalesi sigameko esenzeke mhla ka-9 kwephezulu. Uthi umufi uye kwamakhelwane wakhe eyoxolisa ngemuva kokuzwa ukuthi inyanga imthukuthelele ngoba kunamahlebezi okuthi upanse inkosikazi yakhe.
Ilungu lomndeni kamufi, elicele ukuba igama lalo ligodlwe, lithi bambuzile bewumndeni ngesikhathi esesibhedlela ukuthi njengoba ebeyoxolisa nje, yingoba ebekwenzile yini lokhu abesolwa ngakho, wathi naye uyakweshwama.
Uthi okubaxake kakhulu wukuthi ngemuva kokuthola imibiko yokudlula emhlabeni kukaMnu Luthuli, balibangise emaphoyiseni beyobika lolu daba, bafika nomsolwa ekhona eyobika ukuthi useshaye umuntu wadlula emhlabeni.
“Bekusixaka futhi kusithikameza njengomndeni ukuthi ubechanasa ngaphandle ebe eziyele emaphoyiseni wayobika ukuthi ushaye umuntu washona. Uze wathi uzomngcwaba, kodwa njengomndeni sikunqabile lokho ngoba phela ngumnumzane womuzi wakhe lona, ngeke kwenziwe sengathi ubulale isilwane nje,” kusho leli lungu lomndeni.
Lithi uMnu Luthuli ushaywa nje, ubehambele komunye umuzi “eyolanda isigqoko”, kwazise bekukade kunomcimbi ngempelasonto, kwabakhona omtshela ukuthi umakhelwane wakhe umcasukele emuva kokutshelwa yinkosikazi yakhe ukuthi uyipansile.
“Ube esedlula khona-ke kwamakhelwane eyoxoxa naye, axolise, okuyilapho kuthiwa umhlangabeze ngamaqupha wamthela phansi. Kuze kwangenelelela abanye bezama ukulamula, kodwa walokhu eqhubekile emshaya.
“Uthe esamshaya umkhulu, wakhala ngokukhi kukhona into emlumayo esiswini. Uphuziswe amanzi waphalaza igazi ngaleso sikhathi,” kusho leli lungu lomndeni. Lithi uyiswe esibhedlela ebusuku ngalo usuku lwesigameko, ngakusasa ekuseni bathola umbiko wokuthi usedlulile emhlabeni.
Okhulumela amaphoyisa KwaZulu-Natal, uCapt Nqobile Gwala, uthe umsolwa uboshelwe icala lokubulala.