UMNDENI UKHALA NGOPHENYO
UKHATHAZEKILE ngokushaya ngonyawo lonwabu kophenyo lwamaphoyisa umndeni womfundi obulawe eNdwedwe ngabantu abawu-7, abebemsola ngokuthi ubabambe inkunzi ngenyanga eyedlule.
UBulelani Khuzwayo (20), obefunda uGrade 12 eMashiyamahle High School, eNdwedwe, ushaywe wabulawa ngabantu abamaziyo.
Kuthiwa omunye wabasolwa ubembambele igqubu lokuthi umthathele intombi abeyeshela. Okukhathaza kakhulu umndeni wukuthi yize abasolwa baziwa, kodwa kuze kube yimanje kabakaboshwa.
UNkz Hlengiwe Khuzwayo, ongunina kamufi, uthe: “Ngithole ucingo ebusuku mhla ka-16 (kuMandulo) ngiKwaMaphumulo kuthiwa mangiphuthume kunabantu abashaya indodana yami, bayisola ngokuthi ibakhuthuzile yathatha umakhalekhukhwini kubona. Ngishayele amaphoyisa ngabe sengiphuthuma khona eNdwedwe, nebala ngafika ilimele kanzima ekhanda kodwa isakwazi ukukhuluma nokuchaza ukuthi kwenzekeni.
“Ngithole ukuthi ibivakashele omunye umngani wayo wakhona endaweni, okuthe uma isibuyela ekhaya iphelezelwa ngumngani wayo, bavinjezelwa ngabantu ababaziyo, basola indodana yami ngokuthi ibabambe inkunzi. Batshele umngani wayo ukuthi makabaleke,” kusho uNkz Khuzwayo.
Uthi umngani ubalekile eyofuna usizo, basala abasolwa bayishaya indodana yakhe kwaze kwalamula ukufika kwamaphoyisa.
“Sifike esibhedlela bangitshela ukuthi kayilimele kakhulu, bayithunga emlonyeni lapho ibishayeke khona. Sidlulele ekhaya KwaMaphumulo, kuthe uma sifika khona, ngathola ukuthi isimo sayo sesisibi, ibingasakwazi nokukhuluma.
“Ngiyidlulisele esibhedlela saseStanger kwatholakala ukuthi yophele ngaphakathi, igazi liconsele ebuchosheni. Odokotela bangitshele ukuthi ishayeke kakhulu ekhanda, amathuba okuthi iphile mancane. Kube yisikhathi esincane besayixilonga, yadlula emhlabeni,” kusho uNkz Khuzwayo.
Uthi isingcwatshiwe indodana yakhe, bathole ukuthi abasolwa bebeqamba amanga uma bethi indodana yakhe ibabambe inkunzi, bebakha itulo ngoba befuna ukuziphindiselela ngokuthi ithathele omunye wabangani wabo intombi abeyeshela.
“Okusizwisa ubuhlungu kakhulu siwumndeni, amaphoyisa siwabikele ngakho konke lokhu nabasolwa bayaziwa njengoba ngaphambi kokuba indodana yami ishone, iqale esiteshini samaphoyisa iyobhala isitatimende, ihamba nomngani wayo lo ehlaselwe ihamba naye.
“Sesiqala ukudideka ukuthi yini ebambe amaphoyisa ukuba abophe abasolwa ngoba bayaziwa. Bese ngibala izinsuku ukuthi umatikuletsheni usuzoqala ukubhala, nginethemba lokuthi izophasa ngenxa yokuthi ibizimisele ngomsebenzi wayo wesikole.
“Ngiyafisa kwenziwe ubulungiswa abantu abenze le nto bajeze,” kusho uNkz Khuzwayo.
Okhulumela amaphoyisa KwaZulu-Natal, uCapt Nqobile Gwala, uthe kuvulwe icala lokubulala, amaphoyisa asembambile umsolwa oyedwa oneminyaka ewu-32, asezithendeni zabanye.