"Kulahleke ushuni" ebulawa ephila
UMroza uthi kumhlukumezile "ukufa" kwakhe
KUSENZIMA namanje ukwamukela ubuhlungu abuzwe ngokusabalala kwezindaba zokuthi akasekho emhlabeni umculi kamasikandi, uMroza “Van Damme” Fakude wodumo lwengoma ethi: “Elamanqamu Namhlanje‚” othi lokhu kumphazamise kakhulu emculweni wakhe.
Lo mculi, obe ngowokuqala ukuba yiciko likamaskandi ukuqopha ingoma ehlukanise unyaka (ngo-2016-2017), ukuveze lokhu kwi-albhamu yakhe entsha ephume ngesonto eledlule ethi “Kulahleke Ushuni”.
Uthi ululazeke kakhulu ezweni ngezindaba zokuthi ushonile ekubeni edla anhlamvana. Kunengoma ethi: “Ngibuzwile Ubuhlungu”. kuyona uthi izihlobo zakhe nomndeni bahlukumezeke kakhulu ngalezi zindaba “zokufa‚” kwakhe.
“Ngibuzwile ubuhlungu, ngiyokhohlwa ngifile ngokwenzeke kimina. Emhlabeni ngifunde izinto eziningi njengoba bekukhona abantu abebethi kimi “Mroza sikukhonzile‚” kodwa kwavele kwaphela imali bangilahla kanjalo.
“Kakugcinanga lapho ngoba nokuhlaselwa wukugula kujike izinto, abantu bangijikela, yilapho-ke ngibone khona ukuthi umuntu akalungile emhlabeni ulunge uma elele,” kusho uMroza.
Kule albhamu ubambisene nengqwele endala kumasikandi, uThokozani “Somnandi” Langa, okunguyena otakule uMroza njengoba ebesenyamalele emuva kokuba inkampani abeqopha ngaphansi kwayo, iMabala Noise, ishabalele.
USomnandi, naye okhiphe i-albhamu entsha ethi: “Iyabuza Induna”, uthathe lo mculi wamfaka ngaphansi kweSomnandi Sun ngenhloso yokuba lingashabalali ikhono lakhe.
Ekhuluma neLANGA uSomnandi, uthe ubengeke ayekelele uMroza ngoba uhlonipha ukucula kwakhe okusezingeni eliphezulu.
“Kubalulekile ukuba sisizane singabaculi ngoba ikusasa kalaziwa. Kule nkampani ngizimisele ngokusiza nabanye abaculi. Ngokokuqala ngikhipha lo msebenzi wami nokaMroza ngaphansi kwale nkampani,” kusho uSomnandi.
Uthi la ma-albhamu bazowakhangisa ngendlela ehlukile ngokuthi bangathembeli ezitolo, bazowethula ezindaweni ezahlukene.