Bafuna kudedelwe 'ababulale' iphara

Kuboshwe abawu-8 abebetitinya owesilisa obebahlalise lubhojozi endaweni

Ilanga - - Izindaba - SKHOSIPHI MTHEMBU

SISHUBILE isimo e-Oakford, ngaseVerulam, emuva kokuboshwa kwamalungu omphakathi ngoMsombuluko odlule ngecala lokubulala owesilisa osolwa ngokuhlalisa lubhojozi abantu endaweni.

Amalungu omphakathi afuna kudedelwe abasolwa ngoba ethi sekukaningi ebika emaphoyiseni mayelana nokuhlushwa ngumufi nabangani bakhe, angasizwa ngalutho.

Kuthiwa uMnu Smanga Mngomezulu (23) nabangani bakhe ababili, bashaywe wumphakathi ngoLwesine olwedlule, isidumbu sakhe satholwa ngelanga elilandelayo. Abangani bakhe bona basindile njengoba kuyimanje besemakubo.

Kuthiwa emuva kwalokho, abakwasidlodlo bashaqe amalungu omphakathi okuthiwa abekhona ngesikhathi kushaywa umufi nabangani bakhe. Lokhu kucasule umphakathi, wakhala ngokuthi umufi nabangani bakhe bebengaboshwa yize bekunamacala abavulelwe wona.

Kubantu ababoshiwe kubalwa uMnu Xolani Ndlovu, uMnu Sihle Ngcobo, uMnu Skhumbuzo Ngcobo, uMnu Nhlanhla Zondo, uMnu Brian Khumalo, uMnu Langelihle Jama, uMnu Thabo Ntshantshu noMnu Zakhele Phewa okuvele ukuthi uboshwa nje, kunecala abelivulele umufi emuva kokuba yena nabangani bakhe bemgwaze amanxeba awu-14 bamshiya bethi ufile.

Kubikwa ukuthi umufi nabahlobo bakhe batitinywa nje, indaba isuswe wukulahleka kwebhethri yemoto, okuthe uma kulandelwa umkhondo, kwavela ukuthi yebiwe yibona. Kuthiwa umphakathi ubalandile, bavuma ukuthi yibona abayebile, bakhomba nalapho abayidayise khona.

Kutholakale nezinye izimpahla okuhlanganisa nomakhalekhukhwini abebiwe, abese bedayisiwe. Umphakathi ubatalabhile, ngakusasa uMnu Mngomezulu watholakala esebanda. UNkz Thembisile Ndlovu, ongunina kaMnu Ndlovu, uthe ukhathazekile ngokuboshwa kwendodana yakhe ekubeni umphakathi ubusukhathele ngumufi nabangani bakhe. Uthe abantu bebengasakwazi nokuthuma izingane esitolo ngenxa kamufi nabangani bakhe.

"Amaphoyisa kade ayetshelwa ngalezi zingane ukuthi zisihlalise lubhojozi kodwa ezithele ngabandayo. Kuthe uma umphakathi usuzibambela zona, sekuboshwa indodana yami. Indlela isimo ebesisibi ngayo, ngisho ingane ubungeke usayithuma ebusuku ngoba zibanjwa inkunzi, kuphucwe abantu imali maqede bagwazwe,” kusho yena.

Elinye ilungu lomphakathi, elicele ukungadalulwa ngenxa yokwesaba ukwenzakaliswa - lithe kunenqwaba yemizi eshiswe ngumufi nabangani bakhe endaweni. Lithi bebengenela abantu ezindlini obekuthi uma bengayitholi imali, bathungele imizi ngomlilo.

"Bese kufike lapho umphakathi ukhathele khona yile nto yalaba bafana. Ngelanga abashaywe ngalo, bazikhiphile ezinye izinto abazintshontshayo. Ngikhuluma nje, ziningi izingane zabantu ezinukubezwe ngumufi.

"Bekuthi uma amaphoyisa etshelwa, aphendule ngokuthi mawashayelwe ucingo uma abasolwa bebonakala. Sifuna laba ababoshiwe bakhishwe ngoba kabenzanga lutho. Kungani kungaboshwanga umphakathi wonke ngoba ubusukhathele wukuhlukunyezwa ngumufi?" kubuza ilungu.

Okhulumela amaphoyisa KwaZulu-Natal, uCol Thembeka Mbhele, ukuqinisekisile ukuboshwa kwabasolwa abawu-8 ngecala lokubulala. Uthe bavelile eNkantolo yeMantshi yaseVerulam ngoLwesibili olwedlule, bazophinde bavele ngoLwesithathu.

ISITHOMBE NGU: SABELO MASUKU

UBEKHULUMA aze akhale izinyembezi uNkz Thembisile Ndlovu uma echaza ngokuboshwa kwendodana yakhe, emuva kokuba umphakathi ushaye abasolwa ngokubahlalisa lubhojozi endaweni.

Newspapers in Zulu

Newspapers from South Africa

© PressReader. All rights reserved.