Ufuna amakhosi angene ephalamende
UTHI ufuna amakhosi abe namandla ukudlula amakhansela usomabhizinisi ozakhele udumo ngokuthi uyiSilo sakwaMthimkhulu, uMnu Bryce Mthimkhulu III, omatasatasa neqembu lezepolitiki elisungulwe kulo nyaka, i-African Renaissance Unity (ARU).
UMthimkhulu ungumengameli waleli qembu athi ufuna lilekelele ekutheni amakhosi abe nezwi ephalamende futhi leseke kakhulu nabaholi bezenkolo.
Ekhuluma naleli phaphandaba emuva kokwethulwa kwe-ARU ngokusemthethweni KwaZulu-Natal, esigcawini sabezindaba ebesikwelinye ihhotela eligudle ulwandle, eThekwini, uthe kubalulekile ukuba ubuholi bendabuko buthathe indawo yabo kuhulumeni njengoba bubonakala bushaywa indiva.
Uthi amakhosi yiwona okufanele anikezwe ithuba lokuphatha ukwedlula amakhansela ngoba yiwona azi kangcono ngezidingo zabantu.
“Uma sithatha amakhosi siwafaka ephalamende sikholwa wukuthi angawusebenzela kangcono umphakathi futhi angabantu abathembekile, abangahambisani nenkohlakalo. Sonke siyazi ukuthi kulo hulumeni okhona ibhidlange kangakanani inkohlakalo, wukwenzelela, wukuqashwa kwezihlobo zabathile nokunye okuningi okungalungile.
“Siyakholelwa ekutheni le nhlangano izobuyisa isithunzi sikahulumeni futhi sinxusa abantu ukuba baphume ngobuningi babo bayovota ngonyaka ozayo,” kusho uMthimkhulu.
Kusona lesi sigcawu kwethulwe ngokusemthethweni isigungu esiphezulu se-ARU okukhona kusona uMnu Paul Noah, uNkk Nelisa Mthembu, uMnu Bob Jansen noMnu Trollip Prince.
UMthimkhulu uthi leli qembu kakulona elabantu abathile kepha limele zonke izinhlanga yize noma inhloso yalo enkulu kuwukubuyisela amandla ebuholini bendabuko nabezenkolo.
“Nathi njengeqembu siyakholelwa kakhulu kuNkulunkulu futhi uma sesivoteliwe sifuna ukulwa kakhulu nobubha, ukubhozonyelwa kombuso, yisibalo esiphezulu sabantu abasha abangasebenzi nokunye okuningi imiphakathi yethu ebhekene nakho,” kuqhuba yena.
Uthi njengoba beyiqembu elisafufusa nje, bazokwenza isiqiniseko sokuthi umkhankaso wabo uyaqina kwazise lukhona uxhaso lwemali abaluthole emazweni angaphandle.
Uveze ukuthi njengoba engusomabhizinisi nje, usefake u-R1.6 million kuleli qembu ukuze kuthi kufika isikhathi sokhetho libe selifinyelele kubo bonke abantu.
“Sesifikile isikhathi sokuba abantu babuyelwe yithemba kuhulumeni ngoba sebekhohliswe isikhathi eside, bethenjiswa izinto ezingekho,” kusho uMnu Mthimkhulu.
Ukhuluma eyokunikwa kwamakhosi amandla ephalamende nje, cishe wonke amaqembu anamakhosi kule ndlu yombuso. Kula makhosi singabala iNkosi Mandla Mandela (ANC), iNkosi Patekile Holomisa (ANC), iNkosi Mangosuthu Buthelezi (IFP) neNkosi Russel Cebekhulu (IFP).
Phambilini isiShayamthetho saKwaZulu-Natal sike saba neNkosi Khayelihle Mathaba (engasekho), iNkosi Nyanga Ngubane (engasekho) neNkosi Bonga Mdletshe ukubala ambalwa.