KUZOBUYEKEZWA IMALI EFUNEKA KUBAGIJIMI
KUZOBUYEKEZWA ukwenyuswa kwemali ekhokhwa ngabagijimi ukuvuselela amalayisensi nekhishwa ngamakilabhu uma ehlela imijaho ngaphansi kweKwaZuluNatal Athletics eholwa nguSello Mokoena onguMengameli.
Lesi yisinqumo esithathwe kwiCouncil Meeting yeKZNA ebingoMgqibelo eKingsmead Cricket Stadium, eThekwini. Kulo mhlangano konke kuhambe kahle kwacaca ukuthi uMokoena usazoqhubeka nokuqhoqhobala izintambo yize kuyiwe kuwona enashazwa ngabathile ezinkundleni zokuxhumana.
Okuqaphelekile wukuthi bonke laba abebebanga umsindo ezinkundleni zokuxhumana bebengabonwa nangokhalo kulo mhlangano okuvunyelwane ngokuthi kubuyekezwe ukwenyuswa kwemali yamalayisensi nekhokhwa ngamakilabhu ahlela imijaho. Lokhu kuthiwe kumele kwenzeke ngaphambi kokuqala konyaka ozayo.
Kuzokhumbuleka ukuthi iKZNA ibiphakamise ukuba imali ekho- khwa ngamakilabhu uma ehlela imijaho isuke ku-10% iye ku-15%, amakilabhu amaningi abengakuzwa kahle lokhu.
Nokho kube nezikhalo kubagijimi ngokungaveli kwezinye izinto embikweni wokusebenza kwemali. Amakilabhu aphawule ukungabi khona kombiko weDurban City Marathon ehlelwa yiKZNA. Kubalulwe ukuthi iKZNA kayinalo ilungelo lokuhlela umjaho ngakhoke kufanele lo mjaho iwunike ikilabhu ethile. Okunye okukhalisile wukungacaci kwenkampani ephatha imali yeKZNA.
Kalusalanga ngaphandle udaba lobunikazi beMandela Marathon. UMokoena uthe ngeke akwazi ukuphawula ngalolu daba ngoba lusenkantolo.
Esekhuluma neLANGA ngemuva komhlangano uMokoena, uthe ngeke azihluphe ngabantu ababhala ezinkundleni zokuxhumana bese bengafiki emhlanganweni. Uthi inhloso yabo kusuke kuwukuphaka impi. Uthi into abazimisele ngayo wukubona abagijimi besifundazwe beqhubeka nokwenza kahle.