I-ASHLEY UNITED SEYITHENGWE YIZIQUMAMA ZASEMPANGENI
IGCINE idayisiwe i-Ashley United egijima kwiSouth African Football Association (Safa) KwaZulu-Natal ABC Motsepe League emuva kokuba abaphathi bayo bekhale ngokudonsa ngodizili kwezomnotho.
Kuthiwa ithengwe yithimba eliholwa nguNkosenhle Ngema obeyiphini likaJean Louis Losciuto esaqashwe yiRichards Bay FC.
Kuthiwa bahlongoza ukuyifudukisela kumasipala iKing Cetshwayo bese besebenzisa uMhlathuze Sports Complex, eRichards Bay, njengenkundla yabo yasekhaya. ILANGA lithole ukuthi ngesizini ezayo izobizwa ngeFlamingo FC kanti uSihlalo wayo nguSibonelo Zulu.
UNgema utshele ILANGA ukuthi konke kuqonde ngoLwesihlanu. Uthi bajabule kakhulu ngokuthola ithuba lokuzodlala kwiMotsepe League kwazise bageja kancane ngesizini edlule.
Uthi bazimisele ngokuthatha abadlali abambalwa bese abanye bebanika izincwadi ezibakhululayo ukuze basheshe bakwazi ukuthola amadlelo aluhlaza kwezinye izindawo. UNgema uzokuba ngumqeqeshi aphinde alekelele ekuphathweni kwekilabhu.
UZakhele Gwala ongumdidiyeli walesi sigaba, ukuqinisekisile ukuthi sekuvunyelwene ngakho konke ngokudayiselana. Uthe yingakho umdlalo we-Ashley neLadysmith United ongoLwesithathu uzodlalelwa eMpangeni.
IHappy Wanderers iguqise iNatal United ngo-2-1 koweligi ngoMgqibelo eSouth Coast Academy.
Amagoli eWanderers eze noSihle Myeza noLindokuhle Mazibuko kwathi eleNatal lashaywa nguSamke Sibisi. ISummerfield Dynamos ibuye ngembombo yenal- iti ekuhambeni inqoba i-Edendale Juventus ngo-3-2 ngoMgqibelo eMgungundlovu. Amagoli eDynamos ashaywe nguSizwe Ngcobo amabili noSizwe “Sechaba” Ngcobo.
AweJuventus ashaywe nguS’bongiseni Zuma noZethembe Dlamini.
IGreen Wood Park Friends ibhaxabule iRainham Sporting ngo-4-0 ngoMgqibelo eWorkington Grounds.
Amagoli ashaywe nguSifiso “Chicco” Mdluli amabili, uNduduzo Mkhize noMogamat Zaki abamthole kumaZulu FC.
Isiyonke imidlalo yeSafa KZN ABC Motsepe League engoLwesithathu imi kanje:
EMhlathuze Sport Complex: Milford FC vs Happy Wanderers 15h00.
EKing Edward: UMvoti FC vs GWP Friends 15h00.
EMzisho: Natal United vs Edendale Juventus 15h00.
E-Eastbury: Rainham Sporting vs Durban FC 15h00.
EChatsworth: Summerfield Dynamos vs Dabeka Sporting 15h00.
EMpangeni Rugby Club: Ashley United vs Ladysmith United 15h00.